Shillong, Jan 17, 2023: Meghalaya a•doko doka dam•anirang bang•en dongaha aro iani bidingo skang chasongni dakritingbaanirangko bang•en nikna man•a.
Meghalaya-o maming maniani doka dam•ani mongsonggipa bosturangara dama, dotdrong, bangsi aro uandakgiparang ong•a. Shillong-o 1990 bilsirangoni dal•drobagipa chadamberang an•senge rock music, chong•motan doka-dam•ani rokomsa bewalko nike dal•baha. Shillong-ko Indiani ‘Rock Capital’ ine mingsinga aro bang•a doka-dam•ani bidingo manianirang a•doko ong•atronga.
A•doko bang•a dokna dam•na aro git ring•na changgiparangni dongram ong•a, jekai Lou Majaw aro Neil Nongkynrih aro bang•a mingsinggipa dolrang jekai Summersalt, Soulmate, Palgue throat’s, Maestro, Aberrant, The Czars, Eye 2 Eye, Verbs, Dosser’s Urge aro Afflatus. A•doko bang•a doka-dam•anio changgipa-sapgiparangni ong•baaniko re•anggipa bilsirango bang•en nikna man•aha. Evening Club, jean 1958 bilsio a•bachengahachim, uano doka dam•gipa aro git ring•gipa dolrang an•tangtangni changa sapaniko mesokna gita cholko on•aha.
Indiba, da•o dongenggipa cholrang, a•doko gital gital nakatbaenggipa changgipa sapgiparangna cholko on•na gita chu•ongja. Uni gimin Skotong Minister Pa Conrad K Sangma Meghalaya Grassroots Music Project-ko niksamsoe a•bachengataha, jeon changgipa-sapgiparang aro uandakgipa dolrang ia cholko ra•e dokna dam•na, git ring•na, manderangko an•saoatna aro an•tangtangko namdapatna gita man•gen. Ia cholrangchi a•dokona rorambagipa manderang a•doko doka dam•ani bidingo, u•ina gita man•gen.
A•dok Sorkari dingtang dingtang biaprango doke dam•e git ring•e mesokna biaprangko Khyndailad, Laitumkhrah, Mawkdok aro Sohra-o tariaha. Shillong, Jowai aro Tura-o, caferango live performance, busking, street play aro cafe gitrangko dakrongenga. Cafe-rango indakgiparangko ong•atanio, dokgipa dam•gipa dolrang baksa agangrikna gita cholrangko man•enga. Iarangko dakaniara dokgipa dam•gipa dolrangna dakchakani ong•a. Dingtangmancha doka dam•ani bidingo janapgipa calendar-ko gipin biaponi re•bagipa doka dam•anina gisik nanggipa manderangna tariaha. Meghalaya a•doko nina nitogipa biaprang jekai rong•kolrang aro chi darerang donga. Iako nike, Sohra-ni mingsinggipa Mawsmai Cave-ko iandakgipa doka dam•anio dakmesokgipa ge•sa ong•aha.
Iandakgipa manianirangchi sak 500-na baten dokgipa dam•gipa aro git ring•gipa dolrangna cafe gig aro buskingrangchi jaanti dakchakaniko on•aha.Dingtangmancha tangakarangko songre songgabatna gita dokgipa dam•gipa dolrangna on•aha, jedakode uamang gipin biaprangchi re•na man•gen aro uamangni albumrangko tarianio dakchakaniko man•gen. Dokgipa-dam•gipa dolrangko dakchakna chu•gimik ge-12 doka dam•ani manianirangko ong•ataha aro chu•gimik lak 45.46 tangkarangko dokgipa-dam•gipa manderangna ba dolrangna aro technicianrangna on•aha.
Ia program-ko April 2022-ko a•bachengataha aro ge 150-na baten manianirangko October 2022-ona kingking ong•ataha. Dokgipa dam•giparangna ia manianirangko ong•atgiparangna a•dok sorkari tangkarangko on•aha.Garo Hills-oni saksa git ring•gipa, Cinda Guri, “Anga angni chonmitingonin git ring•na a•bachengaha, indiba jinmao ring•anirangko 2011 bilsioni dakchengaha. Una skangde indakgipa maming cholrang dongjachim, indiba da•o sorkari bang•a cholrangko on•enga. Meghalaya Sorkari da•o chingna MGMP-ko on•enga. Anga gital gital changgipa sapgipa dokgipa dam•gipa aro ring•gipa dolrangko nike namen kusi ong•a aro uamang an•tangtangni changa sapaniko jakkalna gita cholrangko man•enga” ine aganaha.
Ge•gipin ring•gipa dol, LB3, “Chinga 2018-o a•bachengaha aro chinga kusi ong•a, maina chinga da•oba apsan doka dam•anirangko dakna gita man•enga. Pandemic-ni a•sel bang•a neng•nikanirangko chinga man•aha. MGMP-chi chingna jillao bang•bate dokna damn•a cholrangko man•aha. Chingna iandakgipa cholko on•anina chinga Meghalaya Sorkariko mitela” ine aganskaha.
Meghalaya Grassroot Music Project janggi tangani cholrangkosa on•enga, ong•ja indiba jatni a•dokni doka dam•anio namgipa bimingko ripingenga aro niksengatenga. Meghalaya-ni rasongko ra•doe a•palni manderang bang•bate re•bachina gita tourism-ni bidingo niksengataniko on•enga ineba janapataha.