Tura, December 4, 2021: West Garo Hills aro South Garo Hills a•jani gisepgriko donggipa Dangsu A•du songo me•chik saksani manggisiko Sonibar pringo man•aha ine kobor man•soaha.
Ua me•chik bi•sa Dimapara bajar sepango donggipa skulo class X-o poraiengachim. Kobor man•soani gitade ua me•chik bi•sa re•anggipa December 1 tariko selection test porikka sena re•angaoni nokona re•bapiljahani gimin nokni manderang December 3 tariko Dalu pulis stationo missing report-ko on•aha.
Indake Sonibar pringo uni sigimin manggisiko Dangsu A•du buring bolgrimoniko man•aha ine u•iataha. Ua me•chik bi•sa West Garo Hills a•jani Dalu Pulis Station-ni ning•o donggipa Chandapara songoni ong•achim.
Unbaksana West Garo Hills a•jani Raksamgre jolo donggipa Jandamgre songo me•chikma saksa aro Napakgre songo me•asa sakgniko Sonibar pringo mongma doke siataha ine kobor man•aha.
Ua me•chikma Tikrikilla Pulis Station-ni ning•o donggipa Menggotchigre songoni ong•achim ine kobor man•aha. Indake misilbegipa obostarang Garo Hills-o ong•enga.