Shillong, January 8, 2022: Bharatiya Janata Party (BJP) dolni Spokesperson Mariahom Kharkrang Meghalaya TMC-ni ra•bagipa scheme ge•gni WE Card aro MYE Card-ko jegalenba namnikgijaniko parakataha.
Meghalaya Trinamool Congress WE Card-ko a•dokni me•chikmarang aro MYE Card-ko a•doko kam gri roenggipa chadamberangna bikotaha. Indake re•baenggipa 2023 bilsio TMC dolna sorkariko rikna cholko on•genchimode, uamang japrako gong hajar 1000-ko ia scheme-ni gita suale on•gen ine ku•rachakaha.
“Meghalaya TMC a•doko sorkari rikjaoba, uamang sorkari rikenga gita manderangna mesokenga. TMC-ni bikotgipa scheme-rangko aro uamangni agangipa kattarangko name niatgenchimode, uamangko sorkari rikna cholko on•genchim, ong•osa japrako gong hajar 1000-ko chipe on•gen ine kurachakaha. Uamangni kamara vote king prakko gong hajar 1000 brena jotton ka•a gita chacha ong•a. MYE Scheme-ko ra•baanichi a•dokni lak 4 hajar 16 chadamberang namgniko man•gen ineba uamang aganaha. Indiba uamang kam gri roenggipa chadamberangsan MYE Scheme-ni tangkako man•gen ine aganaha, jekon pe•atgenchimode, uamang lak 4 hajar 16 chadamberangko kamgri roatna miksongenga” ine Kharkrang janapataha.
Chinga BJP-ni dilgiparang chadamberangna kamrangko on•enba, uamangko indakgipa scheme-rango ka•donge, janggi tangjachina didina nangnika ineba agandapataha.
“Meghalaya a•dokni manderang an•tangni bil jakchi kam ka•anio bebe ra•a. A•dokni manderang skang chengonin, indin on•ako ra•chakna nangnikja uamang biltangchi kamaiakosa gamchatnika. Indakgipa scheme-rangko ra•bae TMC a•dokni manderang biltangchi kam ka•e cha•aniko chonnika gitasa ong•a” ine Kharkrang WE Card aro MYE Card-ko jegale aganataha.