Tura, Jan 6, 2023:Union Minister of State (MoS) BJP Minority Affairs, Sukrobar pringo Skotong Minister Conrad Sangma-ni jakchi oprake on•gipa PA Sangma Stadium-ona re•ange nieaha. PA Sangma Stadium-ko matchotsrapgijaan, oprake on•aha aro ia project-na 90% fund-rangko ma•mong sorkarisa chamataha ine Union Minister of State John Barla kobor ra•timgiparangna aganaha.
Ia project-ko matchotatna gita Ministry of Minority Affairs 90% dakchakaniko on•ataha. Indake 10% mangkosan a•dok sorkari on•dapana nangaiaha. Ia stadium-ko rikanio gong kror 127 tangkarangko jakkalaha ine Barla aganaha.
Union Minister of State John Barla-ni Garo Hills-ko re•roroe nina Sukrobar saloni a•bachengaha. Indake da•alo PA Sangma Stadium-ona re•anganio BJP dolni State President Ernest Mawrie aro Tura-ni MDC Bernard N. Marak dongpaha.
John Barla Kobor ra•timgiparangna aganengon, “Ia Stadium-na ma•mong sorkarisa fund-rangko on•ataha. Indiba Stadium-ko rika matchotsrapgijaan Skotong Minister Conrad Sangma oprake on•aha. Uni gisepon ma•mong sorkari 90% fund-rangko on•ate dakchakgenchimoba, chingni dakchakaniko gisik ra•na gita maming dakeba Stadium-o sea dongja. A•dok sorkari ma•mong sorkari baksa meliesa kamrangko ka•na nanga. A•dokko tang•doatna aro silroroatna, chinga apsan bakrimna kusi ong•a. Indiba ma•mong sorkarini dakchakaniko man•ani ja•mano maming dakeba seachi jinmana u•iatani aro mitelpilani dongjagenchimode, chingni namnikgijaniko man•gen” ineba aganangaha.
PA Sangma Stadium-ko rikna gita uni sepang jolo donggipa nokdang ge 8-ni manderangko a•rikgalaha ine janapaniko knae, ua a•rikgala man•gipa nokdangni manderangkoba grongeaha.
“Nokdang dake cha•enggipa manderangko a•rikgale tang•doaniko ra•bana man•jawa. Pulis aro District Administration, bilko jakkale Stadium-ni sepang jolo dongenggipa nokdangrangko a•rikgalaha. Uamang da•o nokgri jamgri rona nangengaha. Sorkari uamangni biapko ra•genchimode, uamangna a•ani tangkarangko on•na nanga. Iani gimin anga dingtangmancha duko ga•akenggipa nokdangni manderangko nirok sandichina aro uamangna dakchakaniko on•china mol•molna sika ” ineba Barla agandapangaha.