Garo Hills-ni NGO-rang Mukroh-o a•sel ong•aniko jegalgrima, dos dakgipa Assam pulisrangko sasti on•china dabia
Tura, Nov 23, 2022:Garo Hills-ni dingtang dingtang NGO-rang, jekai Zikku Balgra-ni dilenggipa GSU-CEC, Tura, GSMC CEC Tura, West Khasi Hills-ni FKJGP Aradonga Circle, ADE Aradonga Regional Unit, GSU, FKJGP, ASWA, GSMC Selsella Regional Unit aro Gasuapara jolni nangrimgimin NGO-rang November 22 tarik Monggolbar pringo West Jaintia Hills a•jani Mukroh songo Assam pulisrang sima ario donggipa Meghalaya a•dokona napdrae silai goanichi dos gri ramram manderang sak 5 forest guard saksa janggitangko gimaataha aro bang•a songni manderang man•ahani gimin, Assam Pulisrangni kosako raken jegalgrimataha.
“Mukroh songni je manderangan an•tangtangni gamchatgipa janggiko gimaatahachim, uamangni nokdangrangna chinga gisik ka•tong gimikchi duk ong•rimpaani aro kalimpaaniko parakatna sika. Unbaksana jemangan a•selo ga•ake saknaako man•aha, uamang sakantian ta•rake nampilchina, chingni sika aro bi•a. Indakgipa Assam pulisrangni ka•namgijagipa kamko chinga ra•chakna man•jawa. Ia a•sel ong•ani skanggipa ong•ja, Assam pulisrang pangnan Meghalaya a•dokona napdrae, sima ari jolo songdongenggipa Meghalaya a•dokni manderangko ka•saninggija kal•steke aro sinjete ronenga. Uni gimin, duko ga•akgipa nokdangrangna kakket bichalko on•na man•na gita, jakgittele sandianiko dakchina aro dos donggipa pulisrangko rim•e niam gita sasti on•na nanga” ine NGO-rang dabiangtokaha.
Ia a•sel Assam aro Meghalaya a•dokni sima ario dongenggipa manderangna namen ka•a be•ani aro ra•chakna amgijani ong•a. Maina dos gri ramram manderangko Assam pulisrang ka•saninggija silai goanichi an•tangtangni gamchatgipa janggirangko gimaataha.
Ia a•sel ong•aniara Assam pulisrang an•tangtangni bilko.mesoke kam ka•anichi ong•aha ine GSMC CEC-ni spoke person Rysn Ch.Marak janapatskaha. Uni gimin mikkangchi indakgipa a•selrang ong•taijachina Meghalaya sorkari sima ari jolrango chel•chakgipa dolrangko rakkiangchina aro Assam pulisrangni skatang Meghalaya a•dokona napdrae manderangni kosako ong•gija sinjetanirangko dontongatchina NGO-rang raken dabiangaha.
Unbaksana ia a•selni bidingo ning•tue sandianiko dake duko ga•akgipa nokdangrangna kakket bichalko ra•bana nanga aro dos dakgipa Assam pulisrangko sasti on•na nanga ine NGO-rang dabiangaha.