London, Oct 26: India a•songni mande chongmotan, Indian-Origin Conservative Party-ni Politician, Rishi Sunak Monggolbar salo United Kingdom (UK)-ni Raja ba King Charles III baksa Buckinggham Palace ba Rajani dongramo tom•e chanchirimani ja•mano uko UK a•songni Prime Minister-na seokaha ine songbad-o parakaha.
Prime Minister Rishi Sunak uni skanggipa agan talatanio, “UK a•songo tangka paisani bidingo namen neng•nikani ong•enga,(economic distress). Uni gimin angni skanggipa miksonge kam ka•anian tangka paisana neng•nikaniko mikkango donne kamko ka•chenggen. Ian angni jako ra•e kam ka•ani ong•gen” ine songbad-na parakaha.
“Anga bil amadipet manderangna dakchakaniko on•gen aro dabianirangko on•na man•na ka•donga” ineba ua aganadapataha.
Sunak antisni-ni gisepo Tory dilgipa baksa susae Liz Truss-ko amani ja•man UK-ni gittamgipa dilgipa ong•e, Prime.Minister-na seokako man•aha ine BBC songbado parakaha.
Tory-ni MP-rangko Sombar salo seokani ja•man, ua a•songni manderangna mikkrakataniko on•angenba, “tangka paisani bidingo ra•bie kamko ka•anggen” ine parakataha.
Sunak ta•raken general eleksin-na niamrangko tarie, Scottish National Party, Liberal Democrats aro Green Party-ko okamatgen ineba parakataha.
Ian India a•songni manderangna namen katchabeani aro rasong chabeani ong•a. Batanggimin 1800 bilsirangoni 1947 bilsiona India a•songko British Sorkari sason ka•angaha, indiba da•ode India a•songni dilgipa United Kingdom a•songko sason ka•angskagen.