Sima arini bidingo North Shillong-ni MLA baksa Skotong Minister, Deputy Skotong Minister ka•a ding•chaogrike jera ra•grika 

Shillong, Sep 14, 2022:Brigipa salni Assembly Autumn Session-o Assam aro Meghalaya sima arini bidingo North Shillong-ni MLA, Adelbert Nongrum baksa a·dokni Minister Conrad K Sangma aro Deputy Skotong Minister Prestone Tynsong gisiko ding·chaoe jegrikani ong•angaha.

Re•anggipa March 29 tariko Assam sorkari baksa Memorandum of Understanding (MoU)-o soi ka·grikani gimin North Shillong-ni MLA, Adelbert Nongrum, a·dokni Skotong Minister Conrad K Sangma-ko ka•onange MoU-ko nipiltaichina ra•bie aganahani gimin Skotong Minister Nongrum-ni ra·bianina ra·chake, lekkaniko nichenggija a·dok damgnini gisepo meligrikna man·jaenggipa song dam 12-ko minge on·china aro meligrikna man·gijagipa biaprangona badita chang re·ange nieaha, uko talate on•china aganskaaha.

Skotong Minister Conrad Sangma-ni ia kattarangko aganchakani gimin, North Shillong-ni KHNAM MLA, rang·san ka·a ding·chaoe, iade Skotong Minister-ni kamsa ong·a ine uni agana gita dakjawa ine aganskaaha.

Indake jegrikani ja·mano, Deputy Skotong Minister Prestone Tynsong-ba Skotong Minister-na chakenba, sing•na kragipa kattarangkosa sing·china aro ka·o nange aganjachina North Shillong-ni MLA-ko aganaha. Uamangni jegrikmitting somoio Assembly Speaker, Metbah Lyngdoh uamang sakgittamko ka·sinatna jotton ka·ahaoba uamang sakgittamni ku·rangan gam·bataiaha.

House-o uamang sakgittam minute gnimangna ding·chaoe jera ra·grikaha, indake jensalo uamangko jripatna man·aha, Assembly Speaker, North Shillong MLA-ni sing·anina aganchakchina Skotong Minister-na somoiko on·angaha.

Ia obostani bidingo pilakan suk ong·ja aro uni suk ong·gijaniko ma·sichaka. Indiba bang·batan ua biaprangni gimin name ma·sichenggija an·tangtangni chanchiako agantokenga. Da·o election sepangahani gimin chrikaiode aro ku•rang gam•aiode ong·jawa ine Skotong Minister Conrad Sangma aganaha.