Tura, Aug 23, 2022:India a•songni dingtang dingtang a•dokrang aro a•jarango songdongenggipa A•chik jatni janggi tanganiko kobor man•soani gitade, aiao inmanpile duk mikchi ong•e janggi tangna nangenga.
Indake ong•engon, West Bengal a•dokni Alipuduar a•jani Panialguri songo dongenggipa A•chik me•apa aro me•chikmani songbad-na parakatani gitade, namen neng•nike janggi tangna nangengachim.
Panialguri songo dongenggipa A•chikrang nokdang ge 30 mang dongachim. Ua songo mija re•anggipa jarango mikka jimbee waanichi chiring a•dram be•wakange bang•a a•palrang aro nok jamrang nosto ong•aha. Indiba West Bengal Sorkari maming dakchakaniko on•jaha aro ia obostani bidingo songni manderangna maming dakchakani aro dingtang dingtang sorkari scheme-rangko man•a dongkuja ine parakataha.
Panialguri songni Lailason Sangma, uni jikgipa Sorojini Sangma aro noksul Bebi Sangma-ni parakatani gitade, mikka wae chiring a•dram be•wakangani gimin, West Bengal sorkari dakchakaniko on•pachina dorgastorangko on•ahachim, indiba sorkari aro block-ni BDO maming dakchakaniko on•jaha. Ia obosta ong•a bilsi 5 gapaha, indiba da•alona king king sorkari aro Irrigation Department maming ja•ku de•aniko dakkuja. Uni gimin Panchayat aro a•dokni dilgiparangna janapoba mamingkon aganchakjaha ine songni manderang suk ong•gijaniko parakataha.
West Bengal a•dokni Alipurduar a•jao songdongenggipa Panialguri songni A•chikrang, India Bangladesh partition ba bak dakna skangonin songdonga ine ma•sina gita man•aha ineba u•iataha. North Bengal-o British-rang Cha baganko a•bachengna skangan A•chikrang songdonga ine sandie ma•sigipa manderang parakataha.