Shillong, August 10, 2022: Meghalaya a•dokni gitcham Chief Secretary Kuljit Singh Kropha-ko bilsi gnina pattoko donchina Katchari (Court) raiko on•aha. Ua Maharashtra Coal Block-ni scam-o jak donga ine pulisrang sakkiko man•aha.
Indakde Delhi-ni Special CBI Court, uko bilsi gnina pattoko donchina raiko on•an baksana tangka gong hajar 50-ko dai gamchina ge•etangaha. Kuljit Singh Kropha, Ministry of Coal-ni Joint Secretary ong•achim.
Apsandake Maharashtra Coal Block-ni scamo jak donggipa gitcham Coal Secretary-koba bilsi gittamna pattoko donna raiko on•aha, unbaksana tangka gong lak 1-ko dai gamchina ge•etangaha.
Kuljit Singh Kropha, Assam aro Meghalaya a•dokni Indian Administrative Service (IAS) Officer ong•e 2016-oni 2017 bilsiona Meghalaya a•dokni Chief Secretary ong•e kamko ka•angaha. Uasan ong•aigija Court, Grace Industries Limited (GIL)-ni Director Mukesh Gupta-koba bilsi brina pattoko donna raiko on•aha aro tangka gong lak 2-ko dai gamchina ge•etangaha. Uandake Company-ni ka•rimskarang uko company-na tangka gong lak 2-ko gamchina ge•etangaha.
Ia mamlarangni trial-ko Senior Advocate RS Cheema, CBI-ni Senior Legal Advisor, Sanjay Kumar aro Senior Public Prosecutor AP Singh ra•aha.
HC Gupta-ko minggittam koilani mamlao skang salrangoba badi ka•aha, indake ia mamlarang da•onaba Delhi High Court-o matchotgija dongenga. Indake minggittam koila-ni mamlao jak donggipa manderang jamin (bail) man•ne dongenga.
CBI-ni u•iatani gitade, 2005 aro 2011-ni gisepo dos dakgipa manderang India a•songni sorkari, Ministry of Coal aro Lohara East Coal Block-ko cha•boke cha•aha. Uamang Ministry of Coal-ko GIL-ni bimingo “Lohara East Coal Block” na dingtang biapko sandina tol•e cha•bokaha. GIL an•tangni Company-ni Net Worth-ko 120 kror ine seaha, indiba uamangni net worth 3.3 kror sanchim, unbaksana uamangni capacitor-koba 1,20,000 TPA ine tol•e seaha.
Batanggimin 2015 bilsini August 25 tariko Supreme Court chu•gimik coal block-rangko den•galaha. Indake ian chi•sagipa coal scam-ni mamla ong•enga ine parakataha.