Tura, August 3, 2022: A•chik Holistic Awakening Movement (AHAM) South Western Zone, Ampati GHADC-ni Chief Executive Member (CEM) Albiniush R Marak aro Deputy CEM Nikman Ch Marak-na lekka sedoatenba Takunbari A•khingni ning•o ga•akgipa a•arangko spot inquiry ka•na re•bae uamangni sing•anirangna Inquiry Committee-ni membor-rang name aganchakna man•jani gimin uamangni kamko aro Nokmani kosako kamrangko ka•na chanchianiko raken jegalataha.
AHAM dolni u•iatani gitade, bilsigittamna skang, District Council-ni manderang saksa gipin jat Jiadul Islam-ko A•khing Nokmana maming u•iata gri Gaonbura songaha. Indiba bang•a manderangni jegalaniko man•ne, Jiadul Islam-ko Gaonbura-oni ra•galaha. Ru•uta bilsirangonin Ishakuri songko Takunbari songni A•khing Nokmasa nirok simsakenga. Indake Ishakuri songo songdongenggipa gipin jatrang Department-ni manderangna lekka sedoate, Gaubura songe on•china aro Takunbari songoni ma•ekatchina didianiko man•soaha.
Ishakuri songo dongenggipa bang•bata manderangan niam gri songdongenggipa gipin jatrang ong•a, indake uamang A•chik jatko a•rikgale a•arangko ra•sekdrana jotton ka•enga. Uni gimin AHAM dol Inquiry Committee maini bidingo Inquiry-na re•baa ine sing•anina aganchakana man•janiko aro Ishakuri songo dongenggipa gipin jatrangni dabianiko knachakna nangchongmotja ine AHAM South Western Zone-ni General Secretary Wester Sangma GHADC-ni CEM aro Deputy CEM-ko mol•molataha.