Tura, July 18, 2022: Garo Students’ Union (GSU) Centre Executive Committee (CEC) Tura aro gipin NGO-rangni dabianirangko chu•sokatjaengani gimin re•anggipa July 4 tarikoni sima ari dongija jingjengataniko dakengon, NEHU-ni Vice Chancellor SP Shukla July 7 tariko NGO dilgiparang baksa Vedio Conference ka•e July 14 tariko Tura-ona re•bae chanchirimaniko dakgen ine ku•rachakatani gimin saldok somoiko on•ne jingjengataniko dontongataha. Indiba July 14 tariko VC re•bana man•jani gimin NGO-rang July 14 tarik dipet jingjengataniko a•bachengattaiaha, indake donronggija jingjengataniko dakengani gimin Vice Chancellor July 18 tarik Sombar salo Tura NEHU Campus-ona re•bae jingjengatenggipa NGO-rang baksa tom•e chanchirimangaha aro dabianirangko chu•sokatna adita ka•dongani kattarangko aganangaha.
NEHU Vice Chancellor NGO-rang baksa tom•e chanchirimanio NGO-rang Tura NEHU Campus-o Pro Vice Chancellor (PVC)-ko appoint ka•e on•china dabiengon, niam gita Parliament session-osa ong•gen, uni gimin sal 90-ni ja•mano chanchirimtaianiko dakgen ine ku•rachakangaha. Indake ong•engon, NGO-rang sal 90 ba Octobar 18 tarikona senggen, uni gisepon PVC-ko Tura NEHU campus-o appoint ka•e on•jaode, apsandake jingjengataniko ong•atangtaigen ine parakatskaha.
Minggipin, da•o ong•enggipa NEHU Campus incharge-ko NGO-rang jegalahani gimin, gital NEHU Campus incharge-ko konta 24-ni gisepon appoint ka•e on•gen ine ku•rachakangaha.
Gnigipa dabiani bangbang ong•e dongenggipa vacant postrango gapatna re•anggipa February jaon advertisement-ko on•manaha aro kamrangko ka•engaha ineba aganangaha. Ia kamrangna written testrangko ra•na am•engaha ineba Vice Chancellor ku•chakangaha.
Kam permanant ong•kugijagipa NEHU-ni employee-rangna Supreme Court-ni on•gimin niam gita Equal Pay for Equal Work ba apsan dormahako on•china dabiani gimin aganangengon, ia kamko ka•na gita ge•sa committe-ko songaha aro iani skotong dilgipa HD Prasad ong•a, ua jeko recommend uan ong•gen ine aganangaha.
Unbaksana, NEHU-o man•na nanggipa dingtang dingtang certificate-rangko Tura NEHU Campus-o man•gnok ineba aganangaha. Una agreba Deputy Registar (DR) aro Assistant Registar (AR)-ko appoint ka•china dabiengon, iana advertisement-ko on•aha, mikkang jarangon interview-rangko ra•gnok kamrangko ka•engaha ineba ka•dongataniko on•angaha.
Ia dabianirangko chu•sokatna kamrangko ka•engaha ine ku•rachakangani gimin GSU-CEC-ni President Zikku Balgra N.Marak NEHU-ni Vice Chancellor-ko aro dabianirangko chu•sokatchina jingjengatanio bak ra•pagipa pilak NGO-rangko mittelangaha.
Indake mikkangchiba jatni namgnina aro Tura NEHU Campus-ko namdapatna apsan ku•monge kamrangko ka•angkugen ineba GSU President agandapangaha.