Raksamgre Civil Sub Division-ko gipin biapchi ra•jitangna am•aniko jolni manderang jegala  

Tura, July 17, 2022: Weat Garo Hills a•jani ning•o donggipa, Raksamgre Civil Sub-Division Office-ko Bundukmali Residential Skul Building Complex-ona ra•jitangna Raksamgre Civil Sub Division -ni SDO Nipon Hajong, West Garo Hills a•jani Deputy Commissioner aro MAD-ni Commissioner Secretary-na lekka sedoataniko jolni manderang raken jegalatskaha.

Koborna u•iatani gitade, adita salrangna skang Raksamgre Civil Sub-Division Office-ko dikdiksana (temporary) Bundukmali Residential Skul-ona ra•jitangna am•engani gimin jolni manderang suk ong•jae, rang•gittik NGO-rang, Nokma Soldar-rang aro songni nokni manderang baksa tom•e chanchirimaniko dakaha.

Raksamgre Civil Sub-Division-ni Officer Nipon Hajong, an•tangni sika gita jolni manderang baksa maming ku•mongani gri Raksamgre Civil Sub Division Office-ko gipin biapchi ra•jitangna WGH-ni Deputy Commissioner aro MAD-ni Commissioner Secretary, Shillong-ona lekka sedoataha.

“Beben SDO-ni lekka sedoataniara nama aro bang•a department-rangko ra•bana man•naba donga, indiba pil•sa gita Raksamgre jolna dal•bea gimaani ong•naba donga. Maina batanggimin somoio Raksamgre-ni ning•o donggipa song Darengchigre-o donggipa C&RD Block-ko dikdiksana ine Tikkrikilla-ona ra•jitangaha, indiba da•onaba ra•bapiljaha” ine Joint Action Committee (JAC)-ni President John Pillar A. Sangma u•iataha.

Uni gimin ia chango dikdiksanamangba Raksamgre Civil Sub Division Office-ko gipinchi ra•jitangna on•jawa ine jolni manderang parakataha.

Apsandake C&RD Office-ko ra•jitanga gita mikkangchi ia Raksamgre Civil Sub-Division Office-ko gimaatani ong•naba donga ine jolni manderang ra•jitangna on•chongmotjawa ine parakataha.