Resubelpara, June 12, 2022:North Garo Hills a•jao donggipa Chisim A•pal jolni chadamberangna NGO-ni dilgiparang jekai Dainadubi Circle Youth Organization (DCYO) aro A•chik Indigenous Justice Initiative Forum (AIJIF) baksa bakrime Ja•ripbonchi Livelihood Society (JLS)-ni gita June 11 tarik Sonibar salo dingtang dingtang scheme-rangni bidingo agan talate on·na gita dingtangmancha awareness program-ko Chisim A•pal Community Hall-o ong·atangaha.
Ia awareness program-ko ong•atanio Ja•ripbonchi Livelihood Society-ni Director Te Digros D. Shira, mongsongipa ong•e, agan talate on•angaha. Digros Shira ia program-o mongsonggipa ong•e jinmana aganprakengon, kam gri dongenggipa chadamberangna janggi tangani cholrangko on·na miksonganio dingtang dingtang scheme-rangni bidingo agan talate on·angaha.
Ia program-ko ong·atanichi jolni chadamberangna dakchakaniko on•na NGO-rang baksa ku•monge kamko ka•dilangen ineba aganangaha.
Uandake ia program-ko ong·atanio Loan, Health, Insurance, Agriculture, Food Processing, Tourism aro Skills Development-ni bidingo man•chape Awareness-ko ong•atangaha.
Digros Shira-ni aganani gitade, mongsongbate chadamberang mikkangchi dingtang dingtang Loan-rangko ra•na skangba skie ra•aniko ba training-rangko ra•ani cholko dakchengna nangenga, jedakode pilak kamon chu•sokna dakchakani ong•gen. Unbaksana Dainadubi, Chisim A•pal, Damas songrangara Garo Hills-ni National Highway-ni Gateway ong•ani gimin, Food Processing Unit ba Farmers Producer Company-rangko ia jolna nangchongmotengaha.
Uni gimin ia kamrangko a•bchengatna cholrangko sandie mikkangchi kam ka•anggen ineba Shira parakangaha.Jedakode, mikkangchi bang•a chadamberang aro songni nokni manderang janggi tanganio namgipa cholrangko man•pagen.