New Delhi, May 22, 2022:Ma•mong Sorkari Sonibar salo Petrol litre-prakni damko gong 9.5 aro diesel litre-prako gong 7-ona komiatgnok ine Union Finance Minister Nirmala Sitharaman parakataha.
Union Finance Minister-ni parakatani gitade, petrol aro diesel-ni damrang agrepile bariani gimin excise duty-ko komiataha. Petrol-ni dam gong 9.5 aro diesel-ni dam gong 7-ona komiatgnok ine Union Finance Minister parakataha.
“Chinga Central Excise Duty-ko petrol litre-prako gong 8 aro diesel litre-prako gong 6-ona komiatna gita chanchiaha. Indaken petrol litre-prakni dam gong 9.5 aro diesel litre-prako gong 7-ona komignok. Indake central excise duty-ko komiatanio sorkari bilsio gong krore lak 1 mang kajinako gamna nanggnok” ine Union Finance Minister Nirmala Sitharaman tweeted ka•aha.
Indake, Union Finance Minister gimik a•dokrangon apsan daken petrol aro diesel-ni damrangko komiatchina aganataha. Petrol aro Diesel-ni damrang barianichi ramram manderangna namen neng•nikani ong•enga.
“Unbaksana chinga Pradhan Mantri Ujjwala Yojana-ni gita bilsio, gas cylinder ge•prakna tangka gong 200 ka•e krore 9-na batgipa kangal cholgri nokdangrangna subsidy-ko on•anggen. Iako dakanichi an•chingni ma•giparang aro abitangrangna namen dakchakbeani ong•gen. Ia subdy-ko on•anichi sorkari bilsio gong krore 6100 mang kajinako gamna nangskagnok” ineba Nirmala Sitharaman tweet ka•dapataha.