Shillong, May 22, 2022:Ma•mongni Union Minister Dharmendra Pradhan Sonibar salo Meghalaya a•dokni dabibaenggipa Inner Line Permit (ILP)-ko ma•mong sorkarini dilgiparang baksa agan golpogrikgen ine aganangaha.
Khasi Students’ Union (KSU) Sonibar salo NEHU gate mikkango “Chingna ILP-ko nangchongmota” ine lekkarango see dabiangaha. KSU-ni dabianiko nike ma•mongni Union Minister ILP-ni bidingo ma•mong sorkarini dilgiparang baksa golpoanggen ine ka•dongani kattarangko aganangaha.
Ma•mongni Union Minister Dharmendra Pradhan, North Eastern Hill University (NEHU)-ni chang 27-gipa Convocation-ona okamatako man•ne bakko ra•na re•baaha. Uni NEHU-china napangmiting somoio KSU, NEHU gate mikkango jinma chadenge ILP-na dabiangaha.
Ua manderangni chrik a•boke dabianirangko knaenba an•tangni re•baenggipa gariko dongdipate uamangni ILP-ko a•doko nangchongmota ine dabiengipa kattarangko knatimangaha aro ua KSU-ni membor-rangna ka•dongani kattarangko aganangaha.
Union Minister baksa agan golpogrikmiting somoio, “BJP-chi chalaienggipa ma•mong sorkari indita bilsirangna chingni dabianirangko knachakja. Ma•mongni dilgiparang Assembly-ni ra•gatgimin resolution-na maming aganchakaniko on•kuja. Chinga da•alo chingni a•dokna ILP-ko nangchongmota. Manipur a•doko BJP sason ka•ani bakan walsani gisepon ILP-ko man•aha. Indiba Meghalaya a•dokni dabianiko indita bilsina kingkingba knachakja. Indiba Union Minister-ni agananggipa kattarangko knae, chinga ia changde ILP-ko man•chongmotna ka•dongsoenga” ine KSU-ni dilgipa Pynmeklang Sameit aganaha.
“An•chingni bang•a Politician-rang, Union Minister Dharmendra Pradhan-ni namgipa gunko skie ra•na nanga. Ua chrik a•bokenggipa manderangoni gele katgija batesa uamang baksa agan golpoe manderangni neng•nike dabianiko knachakaha aro ka•dongani kattarangko aganangaha” ine Conrad Sangma aganaha.