Rong•ma Gittil biapko nina re•anggipa manderang gari a•sel ong•e sakgni sia

Kharkutta, May 9, 2022:North Garo Hills a•jani Kharkutta jolo donggipa Rong•ma Gittil biapko nina re•anggipa manderang gari a•sel ong•e, sakgni a•damon siaha ine koborko man•soaha.

Kharkutta MDC Pa Cherak W.Momin-ni kobor ra•timgiparangna u•iatani gitade, Assam Shilluk songni manderang sak 35 mang mahindra pick up bolero gario Rong•ma Gittil biapko nina re•ange, re•angpilmittingo attamni 3:30 bajimango rang•gitik a•sel ong•anichi sakgni manderang a•damon janggi galaha aro bang•a manderang mata buako man•ne saknaako man•tokaha.

Koborni gitade, bilsi 50 mang ong•gipa Shilluk songni me•apa sakgni a•sel ong•gipa biapon janggitangko gimaataha. A•sel ong•anio janggitangko gimaatgipa sakgni me•aparanga Lokat K.Sangma aro Hejalson G.Momin ong•achim.

Uamangoni bilongbate saknaa man•gipa sak 5 manderangko nambate sanna gita Goalpara hospital-ona watataha aro adita sak namkalgiparangko Kharkutta PHC-o first aid-ko on•ne donenga ine Pa Momin u•iataha. Indake a•sel ong•gipa manderangko ta•rake dakchakna gita Emergency 108 Ambulance Kharkutta-o dongjani a•sel adita neng•nikaniko man•aha.

Indake ong•genchimoba, “Angni MLA ong•mittingo on•gipa Ambulance gari bolsa aro Assam-ni Ambulance-ko sandiate saknaa man•gipa manderangko Goalpara-chi watatna man•aha” ine Pa Momin u•iataha.

Uni gimin iandake rang•gitik a•sel ong•gipa manderangna ta•rake dakchakaniko on•na man•na gita pilak CHC, PHC aro Sub Centre-rangon emergency 108 ambulance-rang dongna nangchongmota ineba Pa Momin janapataha.