Union Minister Medical Skill Hunar Hub-ko biming mingjitani gimin suk ong•ja 

0

Tura, Jan 8, 2023: Ma•mongni Union Minister of State for Minority Affairs, John Barla, Pradhan Mantri Jan Vikas Karyakram (PMJVK) Scheme-ni ning•o Garo Hills-na bang•a development project-rangko Ministry of Minority Affairs, Govt of India-ni on•atgipa project-rangko namedake kam ka•engama ka•jaenga re•roroe niangaha.

Indake John Barla skanggipa salo Skotong Minister Conrad Sangma-ni rika matchotgija oprake on•anggipa PA Sangma Sports Complex Stadium-ko nike namen suk ong•gijaniko parakangaha.

Gnigipa salo Babadam Chidekgre-o rikenggipa Medical Skill Hunar Hub (MSHH)-ko re•ange nieahaon, PA Sangma Medical Skill Hunar Hub ine biming mingjite da•osa rikna a•bachengatako nikangaha. Ministry-ni sanction ka•ata gitade, Project-ni biming Medical Skill Hunar Hub ong•achim. Ia dal•begipa project-ko PA Sangma-ni bimingchi mingjitahani gimin, John Barla MDA sorkarini kamko jegalangaha.

Ia dal•begipa project-ko rikna Ministry of Minority, Ma•mong Sorkari tangka gong kror 151.9596-ko 2022 bilsini 2 tariko chamataha. Ia Medical Skill Development Hunar Hub-ara an•seng baljokanina nirok simsakgipa nurse-rang aro paramedical-ni chatro chatrirangna skie on•ram biap ong•achim aro ia Medical Skill Development Hunar Hub-ko rikna sorkarini tik ka•gipa biapo rikgija, Dumindikgre songni manderang sorkari baksa maming agreement sea jota gri aro compensation on•gija nokdang ge 26-ni a•aosa rikna am•enga ine ma•sina man•aha. Maina ia dal•begipa project-ko MDA sorkari donnue aro biming mingjite rikenga ine John Barla MDA sorkario sing•doangaha.

Ia project-ko skanggipa a•bachenge pallang ge 300 Multy-Special Hospital baksa Nursing College ge•sako rikani. Gnigipa Pharmaceutical College ge•sa, gittamgipa Paramedical Colege ge•sa, brigipa Skill Development Centre ge•sa, bongagipa Nursing Hostel ge 6-o pallang ge 100, dokgipa Paramedical Hostel ge 10-o pallang ge 100, snigipa me•asarangna hostel ge 1 pallang ge 500, chetgipa me•chikrangna hostel ge 1 pallang ge 200 aro skugipa Working Womens’ Hostel ge•sako rikna Ministry of Minority Affairs Govt of India tangkarangko on•ataha, indiba da•osa a•bachengenga ine John Barla suk ong•gijaniko parakangaha.

Ia dal•begipa project-ko rikna komibeoba sq ft 398,312 apbale a•arangko nangani gimin, A•king Nokma bigha 98 a•arangko sorkarina indin tangka gri on•aha, indiba ua biapo rikgija gipin biaposa rikskaenga ineba janapataha.

Leave A Reply

Your email address will not be published.