Tura, March 26, 2023: West Garo Hills a•jani Tura songjinmani Edenbari Health aro Wellness Centre-o World TB Day-ko maniangaha.
Ia World TB Day-ko maniengon, “Hoe! An•ching TB sabisiko bon•atna man•gen” ine Katta Bichong-ko donne, West Garo Hills a•jani National Tuberculosis Elimination Program (NTEP)-ko ong•atangaha.
Tom•anio NTEP-ni Joint Director Dr LS Ch Marak jinmana aganprakengon, TB sabisiko sanenggipa manderangna, kam ka•anirangko niate demittelangaha.
“TB sabisiko sangiparangsan jotton ka•ani ong•ja, indiba saenggipa manderangba Dokdor-rangni ge•etanirangko ja•rikna nanga. Sorkarini indin sanne on•aniko man•engon, na•simang TB sabisiko bon•atna nangchongmota ine miksonge pilak ge•etanirangko dakna nanga aro somoi gita samrangko ringna nanga” ine Dr LS Ch Marak aganangaha.
WGH a•jani District Tuberculosis Officer Dr EA Sangma, “Ia tom•aniko dingtangmancha TB sabisini bidingo mikrakataniko on•na gita ong•ataha. Antignina bate gusugenchimode, TB sabisiko porikka ra•e nina nanga. TB sabisiko man•genchimoba, sorkari indin sanna bannaniko on•enga, unbaksana nutrition gnanggipa cha•anirang aro biterangko on•na” ine aganangskaha.
India sorkari re•baenggipa 2025 bilsio TB sabisiko bon•atna miksongenga, indaken rakbee kamrangko ka•enga. Uni gisepon, TB sabisiko man•ne saenggipa manderang ge•etanirangko ja•rikna nanga aro somoi gita samrangko ringchina didiangaha.
Ia tom•anio Essay sesusaanio chegiparangna mongsonggipa sokgipa boksisrangko suale on•angjolaha.
TB sabisiko man•giparang, sanna bannaniko dake nampilgipa manderang, jinmana agan talate on•angaha.
WGH a•jani District Tuberculosis Centre-ni TB-HV, Newtone Ch Sangma aro ASHA-o kam ka•giparang gitrangko ring•e on•anichi tom•aniko an•saoataha.
Tom•aniko matchotatani ja•mano skulo poraienggipa bi•sarangna Quiz competition-koba ong•atangaha.