Tura, Dec 18, 2022: Ja•manchake kobor man•soani gitade, re•anggipa December 14 aro 15 tariko Pencak Silat Special Training Camp-ko Tura-ni Council of Nokmas Building-o West Garo Hills Pencak Silat Association aro Meghalaya Pencak Silat Association nangrime salgnina ong•atangaha.
Ua program-ko ong•atengon, mongsongbate, re•baenggipa January jao ong•atenggipa National Level-o bak ra•na am•engachim, uamangna dingtangmancha skie on•aniko dakna gita ong•ataha. Indake ua training camp-o skie on•na gita Assam-ni Coach ba skie on•gipa, Rimchi Sangma aro Lakshmi Rabha-ko rimbaha aro ua training camp-ko Meghalaya Pencak Silat Association-ni Chief Coach Elbiston Marak dilangaha ine koborna u•iataha.
Ua training camp-ona West Garo Hills-ni ADC aro Project Director, Pa Dolrich G Momin mongsonggipa sokgipa ong•e bakko ra•angaha, indake ua training camp-o bak ra•giparangna agan-ku•pattie on•angan baksa sport ba kal•susaani namgnirangko talate on•angaha. Uandakgipa training camp-rangko mikkangchi ong•atangkuchina Association-ni dilgiparangko didiangaha.
Meghalaya Pencak Silat Association-ni General Secretary Eddy D.Marak-ni u•iatani gitade, ua training camp-o bak ra•giparangoni sakbri chadamberang re•baenggipa National Championship-o Meghalaya State-ko Represent ka•na gita January 8 tarikoni Maharashtra a•dokona re•chakatanggen.