Tura, March 31, 2023: All Garo Hills Merchants’ Association (AGHMA), Meghalaya a•dokni gitcham dilgiparangni niksamsoe donanggipa, Tura Winter Capital-ko songchina, A•chik Conscious Holistically Krima (ACHIK)-ni dabianiko nangnike chakpaaniko parakataha.
“Garo Hills-o Second Winter Capital ba Gnigipa Sin•kario Tom•bimongani Tura-o donggenchimode, a•dokna bang•a namgnirang ong•gen. A•jao bading chiwalanirang tang•dodapan baksa tangka paisa man•anirangba baridapgen. Batanggimin bilsirango a•dok sorkari Garo Hills-ko galchipaha. Unbaksana Second Wintet Capital-na dabianiko knachakjaha. India a•songni bang•a a•dokrangon, Second Capital donga gitan Meghalaya a•dokoba Second Capital-ko donna nanga. Uni gimin A•chik a•songo songdong a•chaenggipa, A•chikrang ku•cholsan ong•e, Second Winter Capital-na dabianio re•mikkangna” ine AGHMA ku•mongataha.
Indake ong•engon, A•chik a•songni namgnina aro silroro namroroanina apsan bakrime kamko ka•na miksongenggipa dilgiparang baksa bakrimpana, chinga jechakani dongja ineba AGHMA janapataha.