Tura, Jan 3, 2023: West Garo Hills a•jani Ganol Chibimako dam kachange current ba bijoli bikotenggipa, Unit-III, 7.5 Mega Watts (MW) Ganol Small Hydro Electrucity (HE) Project-ko a•dokni Skotong Minister, Pa Conrad K.Sangma January 4 tarik Butbar pring 11 bajio oprake on•anggen, ine Meghalaya Energy Coorporation Limitted (MeECL) department-ni Chairman Cum Managing Director Sajay Goyal u•iataha.
Sanjay Goyal-ni u•iatani gitade, ia Unit-III 7.5 Mega Watt, Ganol Small Hydro Project-ko oprake on•ani salo a•dokni Skotong Minister Conrad K.Sangma mongsonggipa sokgipa ong•e bakko ra•anggen. Unbaksa gipin sokbagiparanga Deputy Skotong Minister Preston Tynsong, Health and Family Welfare Minister James Pangsang K.Sangma aro gipin dal•dalgipa Officer-rang dongpae bakko ra•anggen.
Ian skanggipa changna Garo Hills-o wa•alni bilko ba Bijoli-ko bikotchenggipa ong•enga. Ia project-ko a•dokni gitcham Skotong Minister Dr Mukul Sangma 2014 bilsio pangchakani ro•ongko songe, on•ani ja•mano kamko a•bachengate on•angaha.
Ia project-ko chu•gimik matchotahaode, Garo Hills-o bijolina neng•nikani komianggnok ine manderang ka•dongsoenga.