Resubelpara, Feb 5, 2023: Meghalaya Pradesh Congress Committee (MPCC)-ni dilgiparang mikkang nitee party ticket on•ani gimin namnikjae sak 31 Kharkutta Block Congress Committee (KBCC)-ni membor-rang Congress party-oni ong•katgrimaha ine koborna parakataha.
Kobor man•soani gitade, KBCC membor-rangni kam watgrimani miksongara, gimagimin Congress Party-ko tangchaatpilna rakbee kamrangko ka•aha, indiba grassroot levelo kam ka•giparangni namnika gita Kharkutta-ni gitcham MLA aro Congress party ticletna dorgasto on•gipa, Omillo K.Sangma-na party ticket on•gija, gital napgipa, Tura-ni MP Agatha K.Sangma-ni jongsarigipa Chireng Peter Marak-na party ticket on•ani gimin namnikjae Congress party-oni ong•kate, NPP party-o napskaha ine koborna u•iataha.
Congress Party India a•songo bilakgipa ong•genchimoba, Meghalaya a•doko be•gruaha. Uni gisepon re•baenggipa Assembly Election-na candidate-rangko baseanio Congress-ni dilgiparang ka•magipa gadango kam ka•giparang baksa name chanchichenggija, an•tangtangni namnika gita party ticketko on•ani a•sel bang•a Congress dilgiparang aro membor-rang election sepangengon, Congress party-ko wate kattokani a•sel Congress party-ko namen bilgribatataha.