RTI ka•genchimoba bang•a Department-an chu•gimik a•selko aganchakrongja: AOSW
Williamnagar, November 18, 2022: A•chik Organization For Social Welfare (AOSW)-ni General Secretary, Premiar N Sangma bang•a Department-rangan Right To Information (RTI) Act-ko ja•rikjani gimin jegalataha.
Bang•a changon Sorkari Department contractor-rangni gimin aro scheme-rangni bidingo ma•sina namedake ma•sina RTI ka•genchimoba, jechakronga aro chu•gimik koborko parakrongja ine janapataha.
“RTI Act, 2005-ko Indian Parliament-o ra•gataha, jedakode pilak manderang a•jako, songko-nokko tang•doatna aro namdapatna chammatgipa tangkarangko bano aro maikai jakkalaha. Unbaksana sorkarini sualgipa scheme-rangko name ka•ama ka•ja, uko ma•sina gita man•a.
Indiba bang•a Department-rangan RTI ka•genchimoba, chu•gimik obostako parakna jechakronga, ian Parliament-ni ra•gatgimin niamko pe•ani ong•a” ine Premiar N Sangma janapataha.
Ia obostani bidingo chinga Ukilrang baksa agan-golpogrikaha aro ia obostani bidingo kamko ka•na ku•rachakaha ineba ua parakataha.