Tura, Mar 27, 2023: Salantian manderang jinma jinma gari ra•e, dingtang dingtang biaprangoni Daribok Resort-ko nina re•angenga. Ian Garo Hills-o ge•sa mingsinggipa “Daribok Resort” ong•a, jean Nokrek Biosphere Reserve-o dongachim, namen rona rotogipa aro nina nitogipa biap damsa ong•a.
Ia Daribok Resort-ko nina bang•a manderang salsaba chotchanggija re•angenga. Daribok Resort-ko nina re•anggipa manderangko champengani dongja.
Indiba Robibar sal mangmango Daribok Resort-ko chipe donaniko nangnikenga ine bang•a u•igipa manderang, dingtang dingtang whatsapp group-rang aro facebook-rango seachi parakataha.
Bang•a manderangni whatsapp group-rango see parakatani gitade, “Robibar sal an•ching Kristian-rangna namen gamchatgipa ong•a aro antigimiko salsa mangmang, neng•takani ong•a. Robibar salko an•chingna dingtangmancha neng•takani aro olakkiani ong•a. Uni gimin an•ching Robibar salo Daribok re•ange ringa cha•ani sal ong•ja, Isol-ko Olakkiani sal ong•a. An•ching gimikan Kristian-rang ong•e, Mondolio janggi tanggiparang ong•a. Uni gimin, hai an•ching sakantian Robibar salo Daribok re•aniko dontongna. Maina bang•a manderangan Robibar salo Gilja re•gija, Daribok nina re•anganiara an•ching Kristian-rangna namen kragijani ong•a. Gipin salari, saljangchio jegitaba kusi ong•e rona gita man•gen. Uni gimin Robibar salsa mangmang Daribok-ko chipe donaniko nangnikenga” ine Daribok Resort-ni nokgiparangko mol•molataha.