Tura, Dec 29, 2022: Meghalaya TMC-ni a•bachengatgipa Meghalaya Financial Inclusion for Women Empowerment (MFI-WE) Scheme-ni ning•o me•chikrangna on•enggipa WE Card-na Registration ka•a a•dok gimiko sak lak 1.20 gapaha ine u•iataha.
Meghalaya TMC-na kusi ong•e, chakgipa a•dokni me•chikrangko bilakatna miksonge, nokdangantini me•chikmarangna jao tangka gong hajal 1000 ka•e, bilsio hajal 12,000 aro bilsi 5-o gong hajal 60,000-ko on•na bikotgipa, Scheme ong•a.
Ia WE Card-na Registration ka•aniko 51-South Tura elakkao ga•akgipa nokdangantiona TMC Convenor Richard Marak re•ange, Registration-rangko ka•dilenga ine u•iataha. Jedakode nokdangni sakanti ma•giparang, ia Meghalaya Financial Inclusion for Women Empowerment Scheme-ni namgniko man•gen aro me•chikrangna mingsa namgipa dakchakani ong•gen, ine West Garo Hills-ni District TMC Convenor Richard M Marak parakataha.
“Meghalaya TMC a•dokni dingtang dingtang kona noksikrango dongenggipa nokdangantini me•chikrangna, WE Card-ni gimin agan-talate on•na baksana register ka•giparangna ia scheme-ni namgnirangko on•chongmotgen. Chinga ia WE Card-na registration ka•aniko dakengon, manderangni namgipa response-ko nike da•alo namen kusi ong•a aro chu•sokgipa ong•enga” ine Richard Marak kusi ong•aniko parakataha.
Re•anggipa Monggolbar salo WE Card-ko a•bachengataoni antignini gisepon register ka•gipa me•chikrang Meghalaya a•doko gimiko sak lak 1-na bataha. Ia Meghalaya Financial Inclusion for Women Empowerment Scheme-ko a•bachengatanichi TMC-na chakgiparang namen bang•batroroenga. Jekon, All India Trinamool Congress-ni Chairperson Mamata Banerjee, nama miksonganio ia WE Card Scheme-ko re•anggipa December 13 tariko a•bachengate on•angaha.