Tura, April 13, 2022: Silai ra•bitgipa manderang baksa pulisrangni Sombar pringchibara gogrikanio so•ota mandeko pulisrang ma•sina man•aha.
Koborni gitade, Sombar pringni 1:15 bajimango Pulisrangni re•roroe nirok sandimitting somoio Dadenggre Sub Division-ni ning•o donggipa Chibinang jolo AK silaichi pulisrangko chadrapgipanio adita somoina pulisrang baksa gogrikanio guli nange sianggipa mandeko pulisrang ma•sina man•aha.
Pulisrang baksa gogrikanio guli nange sianggipa mandeara North Garo Hills a•jani Darakona songo donggipa Nickson M.Marak sagini depante Wali A.Sangma ong•achim. Ua Phulbari pulis station-ni ning•o donggipa Chibinang Chambakpara songo jik ra•e dongengachim.
West Garo Hills a•jani Superintendent of Pulis (SP), V S Rathore-ni parakata gitade, sianggipa mande batanggipa 2015 bilsio UALA bobil dolni bimingo tangka dabie ra•ani gimin pulis rim•ahachim.Uandake dos dakgipa mande West Garo Hills a•jani pulisrang baksa gogrikanio guli nangako man•ne Sombar pringwalo siaha. Ia a•selara denggu manderangni Dadenggre-ona re•bae gue badinggiparangko rim•sruke ra•angna time dongenggipa manderangko rim•na pulisrangni sandimitting somoio dolsa silai ra•bitgipa manderang pulisrangko silai gosoani a•sel gogrikani ong•aha.Uni sigimin manggisiko post mortem ka•na hospital-ona watataha aro iani bidingo Dadenggre Pulis Station-o mamlako segataha ine u•iataha. Indake iani bidingo sing•sandianiko dakengkua ine SP u•iataha.