Ampati, Dec 18, 2022: Songsalo me•chikrangni kamko mongsongbate ra•na aro me•chikrangko politics-o bil gnangatna nangengani gimin, NPP Mahila Womens’ Conference-ko Sonibar salo South West Garo Hills a•jani Mahendraganj elakkao ong•atangaha.
Ia conference-ko ong•atanio NPP-ni National General Secretary Dr Mehtab Chandi A. Sangma dongpae bakko ra•angaha. Unbaksa, NPP State Working President Semford B Sangma, West Garo Hills District Wimens’ Wing-ni NPP State Working President Silme Ch Marak, West Garo Hills-ni NPP Womens’ Wing-ni Vice President Melina Ch Marak, Mahendraganj-ni NPP dilgipa Sanjay A Sangma, South West Garo Hills-ni NPP District President Nappila Marak, West Garo Hills-ni NPP District President JD Sangma, NPP Nodal Office-ni General Secretary Mathias N Marak, NPP North Tura-ni President Aje Ch Marak, Boldamgre-ni MDC Stevie M Marak, Nogorpara-ni MDC Linekar K Sangma aro Zikzak-ni MDC Akhtar Ali dongpae bakko ra•angtokaha.
Ia program-o Dr Mehtab Chandi, jinmana aganengon, me•chikrangni kam ka•anirangko maming dakeba champengna nangani dongja, maina me•chikrang nokdangko nirokgipa aro an•seng baljokanina nokdangni manderangko name simsakgipa indiba iasan ong•aigija songsalni namgnina aro namroro silroroanina kamko ka•giparang ong•a.
Unbaksana Matrilineal Society-o me•chikrang Nokdangko man•rikgipa ong•a aro ia niamkon da•onaba gimaatgija ja•rikbaenga, indiba me•chakrangko bang•a manderangan politics-ni a•bao kam ka•aniko ra•chakrongja. Indake ong•genchimoba, Meghalaya a•doko me•chikrang bilake aro paraken maming jajaani gri mikkangchi apsan ong•e politics-o ra•chakgipa ong•atna aro an•tangtangko tarina chanchisoani gnang ine Dr Chandi Sangma aganangaha.