NPP, AITC-ko anti-tribal ine matnanga 

0

Shillong, Feb 2, 2023:NPP, AITC-ko anti-tribal ong•gipa party ine matnangaha.

Assembly election sepangbaengon, a•dokni politics namen so•sojengjeng ong•enga. Salantian matnanggrike saksa sakgipin-ni kosako aganmittakgrike, sin•karini salrango ding•doanirangko on•enga ine parakataha.

Sasono ong•enggipa NPP, an•tangtangni manderangna kam ka•ani scheme-rango pangchake, re•baenggipa election-o bang•bate chena ka•dongsoenga, uandaken, AITC-ko anti-tribal party ine NPP parakataha.

Re•anggipa Mongolbar salo, NPP-ni State Party Headquarter-o agantimgipa kobor ra•timgiparang baksa agangrikengon, “Jatni dakbewalko ripingna gita dontonggija kamrangko ka•e, chu•sokaha, indiba a•paloni napbagipa AITC party, a•doko songdongenggipa tribal manderangko onchepna jotton ka•enga. AITC pangnan anti-tribal ong•a, Bengal-oba tribalrangko galchanga aro a•song gimikon AITC, tribal President candidate-na chakja aro tribalrangni ganding-chindingrangko nirikkite matnanganiko dakenga ineba parakataha.

AITC-ni dilgiparang Presidential election-ni somoio indakgipa kattarangko aganronga. TMC, a•aongni President Droupadi Murmu tribal jatrangoni President ong•chenggipa ine u•ioba, Yaswanth Sinhana-nasa chakachim. Unbaksana, West Bengal-ni AITC Minister Akhil Giri, mande ra•ako man•na kragipa Indiani Presidentni bidingo kragija kattarangko aganaha aro apsandaken, TMC-ni dilgipa Kirti Azad Meghalaya a•dokni Khasi jatrangni ganding chindingrangni gimin chonnike aganaha.

Iarangni bidingo AITC maming ja•kuko de•jaha aro kattachi mangmang kema bi•anichi matchotatna jotton ka•aha. Tom•anio, NPP-ni agantimgipa, “AITC-ni anti-tribal ong•aniko rakkienga aro election-o chena gitasa AITC tol•e ku•chakanirangko dakenga aro tribal manderangna ka•samikenga. Manderangni indake tol•pinikanina pangnan mikrakchina mol•molatna sika.”

Khasi aro Garo ku•sikrangko Indian Constitution-ni 8-gipa Schedule-o man•chapatna AITC adita salrangna skang ku•chakaniko miksonge aganaha. Uamangni bilsi 8 sason ka•mittingo Congress ma•mongo ong•e, maiko dakaha, ineba sing•doangaha. Khasi aro Garo ku•sikko man•chapatna krenge mesokaniara politics-na dakmesokanisan ong•aia aro maming miksongani dongja ine u•ina manderang ja•manchakja. AITC a•dokni mongsonggipa jatgittamkon u•ija, maina iako janapatengon, jajae agananirangko nikna man•aha.

“An•chingni a•doko NPP-san ge•sa mangmang national party ong•a, jekon Salgro-Salaram gimik nikna man•a, indiba an•chingni nitogipa Meghalaya a•dokoni ong•bagipa ong•a” ineba NPP dilgipa janapataha.

Leave A Reply

Your email address will not be published.