Tura, Jan 10, 2023: Re•baenggipa Assembly election-o 59-Chokpot elakkao susaenggipa Novembirth Ch.Marak aro una chakgiparang Sombar salo BJP dolo napangtokaha.
Ia public meeting aro joining ceremony-o Raksamgre-ni MLA aro gitcham CEM Benedict R.Marak mongsonggipa sokgipa ong•e bakko ra•angaha, unbaksana Assam-ni BJP member aro Garo Hills-o donggipa ge 12 elakkarangni incharge, South Garo Hills-ni BJP President, Williamnagar district BJP President, Chokpot BJP Mandal President aro gipin BJP dilgiparang dongpae bakko ra•angaha.
Ia dal•begipa public meetingo BJP dilgiparang Novembirth Ch.Marak-ko kusi ong•bee BJP dolo rimchaksoaha. Unbaksana, Novembirth Ch.Marak-na bang•a chakgipa manderang tom•anio dongpae kusi ong•paaniko mesokangaha.
Benedict Marak mongsonggipa sokgipa ong•e, jinmana aganprakengon, MDA sorkarini nokantina tangka gong 5000-ko sualengani gimin talate on•angaha. “Da•o Focus ine biming donne nokantina gong 5000 baksa wak aro do•orangko sualenggipa NPP party-ni tangka ong•ja, ma•mong sorkarini game cha•gipa manderangna on•atgipa tangkasa. Uni gimin na•simang ua tangkako man•jaoba duk ong•na nangja, na•simang BJP dolko bilakatna ku•monge kamko ka•bo, na•simang BJP sorkarini on•atenggipa bang•a dakchakanirangko man•aigen. Ma•mong sorkarini game cha•giparangna on•atgipa tangkako Focus-ni tangka ine election-na skang manderangna sualenga. Uarangko sandina ma•mongni Union Miniater-rang re•bae sing•sandianiko dakgen, unosa ua scheme-ni tangkarang bachi gimaa aro maina jakkala ma•sigen. Tura-ni manderang NPP-ni on•enggipa gong 5000 tangkako man•tokenga, Tura-o game cha•giparang dongama? Ma•mong sorkari Meghalaya a•dokko namroro silroroatna bang•a scheme-rangko Meghalaya a•dokna on•atenga, indiba Conrad Sangma aro James Sangma ua scheme-rangni tangkarangko an•tangtangni pocketo chipenga” ine Benedict Marak aganangaha.
Novembirth Marak, an•tangni BJP dolo napani gimin talatengon, Meghalaya a•dokko man•chengaoni bilsi 50 gapahaoba Chokpot jolko pilak dilgiparangan galchipengani gimin, gimikni gitan ja•man chakbatsranggipa elakkarangoni ge•sa ong•a. Uni gimin Chokpot jolo skia poraiani gadangko tang•doatna, namgipa sanna banani hospital-rangko ra•bana, re•a doani rama jal•langrangko tarina, okkrie janggi tangenggipa manderangna cholrangko on•na aro training centre-rangko a•bachengate on•na man•na gitasa ia bil gnanggipa BJP dolo anga napaha, jedakode ia Chokpot jolo janggi tangani gadangko tang•doatna aro namroro silroroaniko ra•bana man•gen ine aganaha.
“Anga da•alo Chokpot jolo janggi tangenggipa angni ma•gipa pagiparang, jong-ada, no-abirangni grapako nike, uamangni mikchiko u•sitna anga an•tangko on•kange songni nokni manderang baksa kamko ka•na ku•mongaha” ine Novembirth Marak aganaha.
Uni gimin mikkangchi a•song aro jatni silroro namroroanina hai an•ching ku•monge kamrangko ka•enba BJP dolko bilakatna ine Novembirth Marak Chokpot jolo songdongenggipa sakantikon ku•mongangaha.