Ampati, Feb 21, 2023: South West Garo Hills a•jani dolgni NGO-rang FAF aro GSMC nangrime niam gri Garo Hills-ni bolrangko cha•ue, Assam-china ra•angenggipa mahindra pick-up bolgniko Sombar pringni 6:28 bajimango Betasing Gimbilgre songo rim•aha ine kobor man•aha.
Garo Hills a•jani bolrangko niam gri cha•ue gipin a•dokchina salangenggipa mahindra pick-up bolsa, AS-34 C, 0568-ni nokgipa Sahel Ali aro bolgipin pick-up gital registration ka•kugijagipa garini nokgipa Zuhurul Khan ong•achim.
Tryans Marak-ni u•iata gitade, songni manderang kobor on•atani gimin Gimbilgre songona re•angon, bol gatgimin mahindra pick-up bolgniko a•damon nikeaha.
Rim•a man•gipa pick-up gari bolgnini driver sakgni aro gari nokgiparangko NGO-rang badi ka•ani ja•mano, West Garo Hills-ni Divisional Forest Officer (DFO)-na pakwataha ine FAF Western Zone-ni President Tryans Ch.Marak koborna u•iataha.
Indake niam gri Garo Hills-ni bolrangko den•pee, gipin a•dokchina palsruke cha•enggipa manderangni kosako niam gita raka ja•kuko de•e, kraa gita sastiko on•china NGO-rang DFO-ko didiangaha.
Iandakgipa manderang, A•chik a•songni bol-wa•arangko bon•atanirangko champengna mikkangchiba rake kamrangko ka•angkugen ine Tryans Marak parakataha.