Na•a! jeba ong•kan, angade party tangkon watjawa inaigenma? ~ Dr. Pilne A. Sangma

0

Maini a·sel an·ching Garo Hills o namgipa, kakketgipa, ka·sae jatna aro manderangna dangdike on·gipa MLA/MDC/MP rangko nikna neng·bata? Maini a·sel songnok o development komia?

Ge·sa sandirikite nikani gitade,jensalo candidate an·tangko candidate onge an·pake on·a manderangko grongchengon  ”Na·a Mai Partyo Re·baenga, Party Gnangsa Chakatbo, Party Dongjaode Man·dika ba Party tiket man·chengbo, unode dip·ingple wengen, pu·ba pu·ongen” ine bang·bata songadam nokadamrango worker aro voter rang bichal ka·e ku·patichengronga. Bang·a biaprangon mande (candidate)na bate political party ko skanggipa nichengronga.

Maini a·sel an·chingo ge·sa ba ge·gni partykosan ma·sibata? Maina ukosan dal·e ra·a, ka·donga aro unasan riktokaia??? An·tangni sandirikite bang·gija nikgimin gitade:

  1. Mitam manderang ma·a/pani ge·eta partyna pu·ontokaiani a·sel.
  2. Mitamrang dedrangni aganana
  3. Mitamrang segipa/jikgipa aganana.
  4. Mitamra song ba gittimni manderangni aganana.
  5. Bang·bataan gital political party rango ka·dongjae
  6. Saobarangara an·tangni chakgipa party oniko gong·sa gong·gni man·pae cha·ani gimin.
  7. Atchu ambian ia partyo dongbaa ikon ja·rikugen ine heriditary party dake ra·e namoba namjaoba janggi tanga gimikna rim·kingkinge dongani a·sel.
  8. Bang·batede elektion somoio pu·onani antisa ba salgittam skangrang voter rangna sruksruk tangka jakepani a·sel.
  9. Ia party majority votes man·gen aro govt rikgen ine ka·dongsoe personal man·gnina rike.
  10. Tangka bang·bate bilakbate nike.
  11. Jatko re·dilgipa party iasan, ina agre gipin partyde jatko re·dilna sapjawa. Ikon sioba tangoba watjawa, etc.
  12. Ia nokdangni manderangsan ia party ko dilna changaigen. Gipin manderangko partyo dal·atode changjawa sapjawa ine chanchiani a·sel.
  13. Ia nokdangni manderangsa tangka bang·bata,English man·bata, Hindi, Bengoli man·bata. Bisongsa gipin jat rangming assemblyo, parliamento ku·rang on·a man·aigen ine chanchiani a·sel.
  14. Political Party National ong·chong,State ong·chong party ni high command rangni nokdang ming close ong·gipa jemangan ong·gijako niktektekeba ‘Hujur ba YES MAAM’ ingiparang support ka·ani a·sel.
  15. Nokdang ge·sachi chasongni chasongna a·songko sason ka·dilani Dynastic Politics ingipani nama namjako ma·sina ja·manchakani aro ma·sieba ma·sija dakmikgiparangni a·sel.

Je Political Party naba support ka·e uko namdapatna/dal·batatna kakketo kam ka·aniara blongen nama. Mongsongbate election somoio bang·bata (majority) vote ko party ge·sa man·ode govt songnaba altubatbebea. Indiba baita sak party worker rang  aro voter rang Political Partyni miksongani (objective/agenda) aro parake ba donue kam ka·ako sandia? Na·ade angade partyna ka·saa, galna sikja, namoba namjaoba ang party angni chakgipa, inon rimkingkinge dongaigen ine agana.

Sing·anide,ia nang·ni chakstapenggipa Partyra aro uko dilenggiparangra nang·na aro a·songna kakketo kam ka·bebengama? Ia partyko re·dilgiparangara A·chik jatko ripingnagipa bebema? Jat ko pale cha·giparang ong·ama ong·jawama sai??? Angni chakenggipa political partyko re·dilgiparangara mande jatna kangal cholgrina ka·sabebegipa rang ong·ama ong·jasai?

Na·a jeba ong·kan, angade party tangkon watjawa inaigenma? Saniba agana gita, personal developmentko man·onga angade, jawa man·ong man·jaong, development ka·ong ka·jaong, curruption dakong dakjaong anga oktangna jepitangna man·rikode ong·aria ine chanchieha chakstapkuarigenma??

Political party ge·sako rim·kingkinge dongani namja ong·ja nama. Chakatang partyna kakket ong·na nanga aro uko dal·dapat namdapatna kamba ka·na nanga iko jejaenga.   Indiba Political Party ge·sa ba ge·gnikosan mikron nike unan ka·donge dongkamachi, ua political partyni leader ba workerrang kakket bebeo manderang na dangdike on·engama? A·song chigako kakket bebeo re·dilbebengama? Ian sing·anide.

Maiba dal·a a·sel ba neng·nikanirang songna nokna/manderangna sokbaode pangnan an·ching political partyko aro govt ko jaksi ota, saoa, inteka, domkia aro ka·mikenata. Changsamang chanchitokama ua party aro govtkora sawarang rika? Sawa dosi, govt ba political party nama namjani a·selara? Seoke watatako man·gipa MLA/MDC/MP rangnima? Ma nang·ni angnin ma? Election somoio, Political Party ge·sao rim·kingkinggija, tangka poisana dakarigija, personal development na chanchina skang CANDIDATE ba CHAKATENGGIPA mande manchani miksongani (vision) changa sapani (competency), Kakket ong·ani (honesty), Jatna a·songna ka·oksie dangdike on·a sikani (patriotism), ka·tongchi kakket ong·e je mande jatnaba songsalo dangdike on·a sikani (true social worker), an·tangni bading chiwal (bussines) ko ra·donasan miksonga donge chakatgipa ong·gijani, skia pora (educational qualification), songadam nokadamni kangal cholgri randi dukkirangni saknaa aro neng·nikaniko ma·sigipa ong·a ong·gijani. Gamchatbate, Nokgipa Isolko ma·sigipa aro una kengipa (God fearing) ong·ama ong·ja.

Ia janapgimin overall background aro leadership quality rangko sandichenge seokode mai ong·genchim?

Gmik Political Partyan nama ne. Gimikan A·song/Jat/Manderang nan dangdikna miksonggipa ong·a. Indiba partyko re·dilgiparangde manderangsa. Govt koba an·chingni seoke watatgipa manderangsa rika. Dakode an·chingra seokatenggipa mandekosa nichengna nangjama? Skang Raja/Rani rangni chasongode sason ka·gipa kakketgipa/ka·sagipa/sapgipa ong·ode a·song sila aro manderang kusi ong·a. Indiba da·ode an·chingde Democracy sa. Manderangsa sason ka·gipa dilgiparangko seoka. Na·a anga namako kakketko seokman·gakosa a·song chiga silgen. Miksonga namgijagiparangko seokgakatman·ode a·song siljawa, manderang cha·a sigen.Akgal karap ong·gen. Gipin ma·malrang napdrae dokkol ka·gen unode jat aro a·song sigen!

RIKNABA MANDERANGNI JAKON, RUGALNABA MANDERANGNI JAKON.

Iako an·ching gisik ra·atna. A·chik A·song Tangbangchina.

Leave A Reply

Your email address will not be published.