Shillong, Jan 19, 2023: Ru•uta salrangna galchipaniko man•ani ja•mano chu•sokaniko man•aha, batanggimin 2018 bilsio State Assembly Election ong•na skang, a•dokni skotong minister Dr Mukul Sangma-ni sorkari bang•a tangka paisarangni bidingo matnanganirang nakataha ine koborna u•iataha.
Iani a•sel manderang Congress-ni bilsi 8 sason ka•aniko gale, NPP-ni dilenggipa MDA sorkariko seokaha ine nikna gita man•aha.
Batanggimin 2018 bilsio, skia porani bidingo Meghalaya namen ja•manchakachim aro bang•a skul nokrangkon taridapani dongjachim. M-TAB-rangko sualani bidingrangoba ong•gija dakanirangko knaachim.
A•dokni BJP dilgiparangni aganani gitade, RTI ka•e sandianiko dakahaon, gitcham a•dok sorkari ge 25,000 M-TAB-rangko gong 8,990-na breaha ine mesokaha, indiba tablet ge•prakni dam gong 6,850 san ong•aiachim.
BJP dol iani bidingo CBI-chi sandirikkitaniko dakchina dabiaha. Bilsi bonga batangaha, Dr Mukul Sangma aro una kam ka•enggipa I-PAC, iandakgiparangko togina cholrangko sanditaienga ineba matnamgaha. Iarangko social mediao ingrikgiparang aro sorkarini gimin am•sandie nigiparangko iandake togianirangko sandina rakkiaha.
Indiba, uamangni sandie nikanio jegrik ingrikgiparang, mandeko bimang sale social mediarango gatanirang aro da•o dilenggipa minister-rang bobilni kosako namgija agananirangko nikaha.
Indake ong•engon, Conrad Sangma-ni sorkari Meghalaya-ni dingtang dingtang bakrango dam 2000 skulrangko taridapengaha aro adita skul nokrangko taridapaha. Dam 21 People’s College-rangko a•bachengatengaha aro chubata gadango poraichakram biaprangko a•ja ge•prakon dakna am•engaha, Capt. Williamson State University College-ko Ampatio rikaha, Shillong Government College of Engineering, College of Architecture and Urban Planningko Tura-o, Model Degree College-ko Patharkhmah aro Rongjengo rikengaha.
Da•o dongenggipa college-rangko Model degree college dake Nongtalang, Mendipathar aro Mawkyrwat-o tariengaha. Polytechnic institute-rangko Ri Bhoi, West Khasi Hills, South Garo Hills a•jarango rikenga aro Williamnagar polytechnic-koba rikna a•bachengaha.
Congress-ni sason ka•anio chadamberangko nirokgija galchipahachim, indiba da•o uamangni nangnika gita nirokanirangko dakengaha ine u•iataha.
A•dokoni party ong•jani gimin AITC a•dokni nangnikaniko u•ina gita man•jaengnaba donga aro batanggimin sorkarini galchipaniko man•aha ong•jaode, uamang chadamberangna kam ka•janaba dongachim. Da•o Meghalaya-ni manderang uamangni kattarangko bebe ra•genma, ma an•tangtangni gisik seng•aniko jakkalgenma, uko nina nangkuenga.
AITC iani bidingo an•tangtangni a•dok West Bengal-onin jegalako man•enga. Uamangni Higher Educational gitcham minister tangkarangko ong•gija dakaniko ra•chakani bidingo sastiko man•enga aro da•o pattoko dongenga.
Iako unbaksa kam ka•gipa Arpita Mukherjee-ni nokrango bang•a tangkarangko nikani ja•mano rim•aha. Kror-ni kror tangkarangko man•a baksana skigiparangko rakkiani bidingo ong•gija kam ka•anirangko rim•aha. Arpita Mukherjee baksa uni melianiko ma•sie, uamangni party biming namgijako man•aha. Skigiparangko rakkianio ong•gija kamrangko ka•aha, Kolkata High Court-ni gita sak 142 skigiparangko ra•galaha.
Indake ong•engon, Meghalaya-o dongsoenggipa minister-rangba tangka jakkalsretanio biming donggiparang ong•e, je political party-an an•tangni a•doko kror-ni kror tangkarangko jakkalsretanio biming dongode, iandakgipa sorkariko baseanio Meghalaya-na mikkangchi maidakgipa ong•gen ine sing•doangaha.
Je sorkarian kam ka•anirango chu•sokaniko ra•baenga, ua sorkarisa mikkangchi namroro-silroroaniko ra•bana man•gen. Ian manderangni basena rakbeani ong•ja ineba janapataha.