Tura, May 11, 2022: Meghalaya Chambers of Commerce (MCC)-ni President, Tura Super Merketni paikanarangko rongtalatgija sera bera rakkiani gimin Tura Municipal Board (TMB)-ni Chief Executive Officer (CEO)-na lekka sedoataha.
MCC-ni President Wilver M.Dango-ni seatgipa lekkao janapatani gitade, Tura Super Market-ni paikanarangko name rongtale jakkaljaengani gimin darangba ua paikanako jakkalna pa•jawa. Panrangkoba su•galja aro rongtale rakkijani a•sel manderang panni a•palo su•buna nangenga. Uasan ong•aigija paikanarango chu•onga gita chirangko man•jani a•selba rongtal ant•alani namen komia aro namgijagipa balwako ra•baa.
Paikanarangoni ong•katgipa namgijagipa balwako Super Marketni dokkan ge•antion soa seenggipa bibarangko rang•sitna nanga. Uandakgipa bibarangko rang•sitanichi manderangna sabisiko ong•atna ama.
Paikanasan ong•aigija jabol galchakramkoba name rongtale rakkija, indake ong•anichi bang•a kona noksikrangon jabol galaniko nikna gita man•a. Iarang namen kragijani aro nitogijani ong•a. Uni gimin ia obostarangko name nirok sandina nanga aro a•jao sabisiko champengna paikanarangko rongtal an•tale rakkina nanga ineba janapataha.