Marak Nokatgre songo me•chik saksako til•ekdraa

0

Tura, April 24, 2022: Ja•manchake kobor man•ani gitade, West Garo Hills, a•jani Jengjal Pulis Station-ni ning•o donggipa Marak Nokatgre songni bilsi 20 ong•gipa dambe me•chik saksako Rangsak Konai jolni me•asa Kugrang M.Sangma drae til•ekaha.

Kugrang Sangma-ni kragija til•ekdraako man•gipa me•chikni chrikako ua jolni pante saksa knae, buringchiko niaton me•asa saksani drae til•ekengako mikrontangchi nikaha ine aganaha.
Mikrontangchi nikgipa panteni kobor ra•timgiparangna aganani gitade, me•chikni chrikako knae mai dakenga ine sing•atani gimin me•asa sorokona re•bae, “anga angni mikchatangako jeba dakgen” ine aganchakaha. Ua pante me•chikni sambaona re•ange nion me•chik siboke mamingkon aganna man•jaha, indake ua me•chikko saldoe sorokona rimbahaon dos dakgipa me•asa bike sale katangaha. Dikdiksani ja•mano me•chik mikselahaon nokni manderangna phone ka•e me•chikni ong•a obostako aganataha. Indake ua pante me•chikko nokchina rimangmittingon ramao me•chikni pagipako grongaha ineba aganaha.

Indake ua apsan salni attam 5:45 bajimango nokni manderang Jengjal Sub Divisional Hospital (JSDH)-ona porikka ra•e nina gita rimangaha. Indiba JSDH-ni dokdor ua me•chikko porikka ra•e, niani ja•mano maming evidence-ko seatgija duko ga•akgipa me•chikko normal ong•aia ine watatpilaha. Indake April 21 tarik Bristibar salo nokdangni manderang Jengjal Pulis Station-o badi ka•e, mamlako segataha, indiba Jengjal pulis dos dakgipa mandeko April 23 tarikona kingking sandie rim•gija donaha.

Ia a•sel ong•aniko kobor man•soe, Social Activist-rang mediani manderang baksa Marak Nokatgre songona re•ange duko ga•akenggipa me•chik aro nokdangni manderangko gronge, Sonibar attamo Tura Women Pulis Station-o badi ka•dapeaha. Social Activist-rangni aganani gitade, ia dal•begipa me•chikni mamlako JSDH-ni dokdor maina dos dongako dongja ine paraka, ian dokdorni dal•a gualani ong•a. JSDH dokdorni report-ko nikon uano maming evidence-ko sea dongja, maini gimin til•ekdraako man•gipa me•chikko porikka ra•e nianio evidence-ko donuaniara ra•chakna man•gijani ong•a aro duko ga•akgipa me•chikna kakket bichalko on•na sikgija kam ka•ani ong•a. Me•chikni kosako ong•gija dakgipa mamlako namedake ma•sigipa ba expert ong•gipa dokdor-rangko JSDH-o rakkina nanga, jedakode mikkangchi iandakgipa obostarang ong•taijawa ineba mikkrakatangaha.

Minggipin, maini gimin Jengjal thana-ni pulis dokdor-ni report tik ong•gijako ra•chake jrip donna nanga aro badi ka•ani ja•mano maina dos dakgipa mandeko sandie rim•ja ine Social Activist-rang sing•doangaha.

Jengjal pulis maina me•chikni pagipako thanao ru•ute statement ra•e neng•nikaniko on•na man•ja aro duko ga•akenggipa me•chikko phone ka•e thana-ona okamate harass ka•na niam dongja batesa uamangna ka•dimeani kattarangko aganne nanga. Pulisrangni kattarang namgijako nike Social Activist-rang pulisrangni kamko raken jegalangaha. Pulisrang maming saloba duko ga•akenggipa me•chikko phone ka•e onkamatna nangja, pulisrangsa me•chikni nokchi re•ange rimbaenba hospitalo porikka ra•na nanga.

Unbaksana, Tura Women pulis jensalo me•chikrangni case-ko ra•engon, simsake nama kattarangkosa agan ku•pattie on•china gitaba mikkrakatangaha. Maina duko ga•akgipa nokdangni manderangko indake statement-ko ra•ani ong•chongmotja aro niamba dongja ine Social Activist-rang mikkrakatangkuaha. Indakgipa obostarang pulisrangni kam ong•enga. Pulisrang duko ga•akgipa aro kal•akako man•gipa me•chikrangko namedake siksakna nangchongmota, namrenge ra•na nangja, bakbesa dakchake on•na nanga. Indake ong•genchimode, duko ga•akenggipa me•chikrang pulisrango ka•dongani pal batesa kenani ong•skaenga ineba parakataha.

Dos dakgipa Kugrang Sangma-ko Jengjal pulis rim•gija donengani gimin, Social Activist-rang duko ga•akgipa me•chikko rimange Sonibar attamo Tura Women Pulis Stattion-o badi ka•dapeaha.

Uni ja•mano ua me•chikko sorkari hospital-o porikka ra•e nitaiahaon, a•sel ong•aoni salbri ong•pilahani gimin maming chin ba evidence-ko man•jaha ine Senior Medical Officer saksa u•iataha.

Senior Medical Officer-ni u•iatani gitade, JSDH-o iandakgipa mamlako porikka ra•engon, uamangni hospital-o see on•gipa lekka ramramsan ong•aia, sorkarini on•gipa Reporting Format-ko jakkalja, uanosa chu•gimik evidence-ko see rakkina man•achim.

Ua reporting format lekkarang dongjaode pangnan update ka•na nanga. Iandakgipa me•chikni mamlako jako ra•engon simsake chu•gimik evidence baksa report-ko tarie skanggipa Victim-na gnigipa Investigation Officer-na aro gittamgipa Hospital-o record rakkina nanga. Dukko ga•akgipa me•chikko a•sel ong•ani attamon JSDH-o porikka ra•na rimangani gimin chu•gimik evidence-ko man•na kraa, indiba uamangni report-o seani gitade maming evidence-an dongja normal ong•aia inesa parakaha.

Uni gimin iandakgipa obostarang mikkangchi ong•taigenchimode, me•chikrangna namen kenchakani ong•gen aro duko ga•akgipa me•chikrang kakket bichalko man•jawa. Ua hospital-ni dokdor-rang Incompetent ong•a, maming evidence-an dongja aro report chuongja ineba Officer parakataha.

Ua me•chikko salbri ong•ahaosa Tura-o medical check ka•taiani gimin, maming evidence-koba man•jaha, indiba ua me•chikko, One Stop Centre (OSC)-ona watate nirok simsakaniko dakenga ine Senior Medical Officer parakataha

Leave A Reply

Your email address will not be published.