Mahatma Gandhi-ni atchiani salko maniani salo a•songni President Meghalaya a•dokna Award-ko on·a

0

Shillong, Oct 3, 2022: Meghalaya a•dok Jal Jeevan Mission (JJM)-ni kamko chu·sokatanio nambatsranggipa a·dokrangoni damsa seokako man·ahani gimin a·songni President Draupadi Murmu, Meghalaya a·dokni PHE Minister Renikton Lyngdoh Tongkhar-ni jako Award-ko on·aha.

Songadamrango donggipa nokdangrangna ringani chirangko sokate on·na ma·mong sorkarini ra·gatgipa Jal Jeevan Mission (JJM)-ni kamko chu·sokatanio Meghalaya a·dokba nambatsranggipa a·dokrangoni damsa ong•a ine seokako man·ahani gimin Robibar salo, Gandhi Jayanti ba Mahatma Gandhi-ni atchiani salko India A•songni Skotong songjinma New Delhi-o maniani somoio Meghalaya a·dokna a·songni President Draupadi Murmu-ni jakchi Award-ko on·angaha.

Ia Award-ko Meghalaya a·dokni PHE Minister Renikton Lyngdoh Tongkhar, President-ni jakoniko ra·chakeaha. Indake ia upattiko on·ani somoio Ma•mong sorkarini Union Jal Shakti Minister Gajendra Singh Shekhawat-ba tom•anio dongpae bakko ra·angaha.

Official-rangni u·iatani gitade, JJM-ni kamko chu·sokatanio Meghalaya a·dok, States/UTs category-o gnigipa biapko man·aha aro ‘Har Ghar Jal’ (HGJ) status-o Meghalaya a·dokko Assam, J&K, Kerala, Manipur, Nagaland, Rajasthan, Sikkim, Tripura, Uttarakhand, Karnataka, Goa aro gipin a·dokrangna skang biapo donataha.

HGJ status-o Meghalaya a·dok, dam 597 songrango chu·sokgipa ong·aha aro dam 1500 songrango chi pipe-rangko teke on·ani 100% gapaha ine parakataha.

JJM-ni kamo chu·sokgipa ong·ahani gimin PHE department-ni official-rangko aro gipin kam ka·giparangko mittele aganangengon, 2019 bilsini August jao JJM-ko a·bachengatani somoio, songadamrango dam 4500 nokdangrangsan ringani chirangko man·engkuachim, indiba da·alo dam lak 2.53 nokdangna baten chirangko sokate on•na man·ahani gimin chang 55 baridapaha ine Meghalaya a·dokni Skotong Minister Pa Conrad Sangma parakataha.

“A·doko songdongenggipa manderangna chu·onga gita ringani chirangko sokate on·anian sorkarini mongsonggipa miksongani ong·a aro ian neng·nikaniko man·batsranggipa kamba ong·aha. Indake ong·genchimoba a·dokni diltubatsranggipa biaprangona ringani chirangko sokate on·na rakbee kamrangko ka·ahani gimin, anga dingtangmancha ia Award-ko PHE department-ni official aro kam ka·giparangna on·kangna sika,” ine Pa Sangma parakataha.

Leave A Reply

Your email address will not be published.