Tura, October 26, 2022: Meghalaya Janata Dal United (JDU) dolni General Secretary Joshua Ch. Marak, re•baenggipa 2023 bilsini MLA eleksin-na candidate rangko seokna a•bachengaha ine parakataha.
“Chinga Meghalaya a•dokni ge 60 elakka-rango candidate-rangko seoke eleksino susaanggen. A•dokni kona noksik gimikni manderang JDU party ticket-ko man•na chingona re•bae mol•molangaha. Indiba chinga manderangko chekchenggijade party ticket-ko on•jawa. Chinga candidate-rangko seokengon, jinmani nangnikanirangko nichenggen. Candidate-ko seokani altua katta ong•ja, maina nama candidate-ko seokanichi dolko bilakdapatna man•gen. Jatna, a•dokna, a•jana aro kangal cholgri pilak manderangna mikkang nitegija kakket ka•sagipa mandekosa chinga seokgen. An•chingni da•o ong•enggipa MLA-rang seokako man•miting somoio, jatna, a•dokna aro manderangna kamrangko ka•na ku•mitchetachim. Indiba uamang da•alonaba ku•mitchetatangko rakkijaha” ine JDU-ni General Secretary Joshua Ch Marak janapataha.
Uni gimin JDU dolni dilgiparang pilak manderangni nangnikanirangko chu•sokatna aro jatna a•dokna kamrangko ka•na an•tangko on•kange re•baenggipa 2023 bilsini MLA eleksin-o dam 60 elakka-rango susaanggen ineba parakataha.