Ampati, Jan 21, 2023: Garo Students’ Union (GSU) Central Executive Committee (CEC) HQ, Tura-ni Assistant General Secretary aro Ampati GSU Western Zone (South)-ni President Salman D.Sangma January 20 tarik Sukrobar salo kam watani chittiko GSU-CEC-ni President Tengsak Gabil Momin-na seataha.
Salman D.Sangma-ni songbad-na see parakatani gitade, bilsi 8 mangna GSU-o kam ka•e, bang•a skidapaniko man•ahani gimin GSU-CEC-ni dilgiparangko mittelataha. Ua GSU-o donge kam ka•anio maming neng•nikani dongja, indiba, an•tango dingtang dingtang kamrang dongani gimin, gital chadamberangna cholko on•skana miksonganio GSU dilgipani kamko wataha ineba parakataha.
“Anga da•alo GSU-o donge kamko ka•jaoba, GSU CEC-ni dilgiparangko mittelna sika, uamang angna namgipa agan-ku•patianiko on•aha. Uni gimin anga pangnan GSU dilgiparangko gualja. Batanggimin salrango angni GSU-ko re•dilmitting somoio angni maiba gualanirang donggenchimode, angko GSU dilgiparang aro gipin ka•rimakarang kema ka•china” Salman Sangma GSU dilgiparangko mol•molataha.