Gasuapara-o World Environment Day-ko manianga 

0

Baghmara, June 6, 2022: A•gilsak gimikchin June 5 tariko ‘World Environment Day’ (WED)-ko bilsianti maniengon, South Garo Hills a•jani Dimapara jolo donggipa Self Help Group (SHG)-rang, CLLMP Committee-rang, songni Nokmarang aro ADE Gasuapara Regional Unit baksa bakrime, “Save Trees, Save the World, Save Yourself” miksonganiko donne bang•a bolrangko ge•angaha ine u•iataha.

Gasuapara jolni dingtang dingtang biaprango bolrangko ge•ani miksongara a•gilsako chansokgija dal•dalgipa karkarnarangchi, bomrangko porikka ra•e nianichi aro salantio jakkalenggipa garirangni walkurang mandeni salantio rang•sitenggipa balwarangko namgijaona ong•atenga. Indake namgijagipa balwarangko rang•sitanichi manderang sabisiko man•na altua.

Indake ong•engon, a•gilsako janggi tangenggipa manderang sakantian an•tangtangko namgijagipa balwarangoni naljoke janggi tangna gita sorkari aro songdonggipa manderang baksa bakrime kamrangko ka•anichisa a•songo bol wa•arangko ripingna man•gen aro namgijagipa balwako gimaate, namgipa balwako rang•site janggi tangna man•gen ine ADE Gasuapara Regional Unit-ni President Callynecan Sangma janapataha.

Uni gimin songdonggipa manderang samtangtango donggipa bol wa•arang, buring bolgrimrangko ripingna nanga aro chiring chibisikrangko tange rakkiangchina ADE Gasuapara Regional Unit manderangko didiangaha.

Unbaksana skatang adokni bol wa•arangko gimaatgija, tipangenggipa chiring chibisikrangko tangatpilna, tangsekgilgil ong•telaigipa buring bolgrimrangko nosto ka•e galaniko champengchina, niam gri bolrangko ratenggipa manderangni kosako raka ja•kurangko de•angchina sorkariko mol•molangaha.

Meghalaya a•dokko “Tangsimgipa,” a•dok ong•atna, Meghalaya-ni Skotong Minister Conrad Sangma aro a•dokni Forest & Environment Minister ia obostarangni bidingo ta•rake namdapataniko ra•bana nangchongmota ine Callyneccan Sangma jinmani palo Meghalaya sorkarina ku•rang on•ataha.

Leave A Reply

Your email address will not be published.