Tura, July 24, 2022: Garo Hills a•jani BJP dolrang, Tura-ni MDC aro a•dokni BJP Vice President Bernard Marak-ni baganko aro uni ma•gipani nokko pulisrang niam gri chadrape napdraaniko raken jegalataha.
Ian Skotong Minister Conrad Sangma-ni jaksa ong•a. Ua an•tangni elekkatangon re•baenggipa eleksino chejawaha ine niksamsoe indakgipa kamrangko ka•soenga ine Garo Hills-ni BJP matnangaha.
Pulisrang West Garo Hills a•jani DC, SP, DFO (Territorial)-ni niamko ja•rikgija Bernard Marak-ni baganko aro ma•gipani nokko maming warrant gri chadrapaha. Uni ma•gipa noko saksan dongenga, indake walni somoio buchuma mandeni nokko maming warrant gri chadrapaniara nama ong•ja. Pulisrang Bernard Marak-ni bimingko Garo Hills-o nosto ong•atna jotton ka•enga. Garo Hills-ni bang•bata manderangan NPP dolo ka•dongjae BJP dolo ka•donganiko nike NPP gimik cholko jakkale BJP dolko namgija biming man•atna krengenga.
GHADC-o Bernard Marak corruption-ni bidingo changni chang chadenge aganaha aro ua jinmana bang•a changon NPP dolni tangka jakkalsretani bidingo aganprakrongachim.
Rimpu Bagan-o rim•a man•gipa manderang an•tangtangko pale cha•gipa manderang ong•ja aro ua nokara chonbegipa Home Stay sa, pale cha•giparangni nok ong•ja ineba jegalataha.
Ua bagano dongenggipa sakgni bi•sarang uni simsakani ning•o dongenggiparangsa ong•a. Saksara poraienga aro saksara sko tik ong•bregijagipa jeni pagipaan salanti cha•na ringna neng•skime janggi tanggipa mande ong•achim. Uamangni dukko nikesa Bernard Marak uko dakchakna an•tangni baganona rimbae donengachim. Ian NPP dolni BJP dolko galonna miksonge ka•gipa kamsa ong•a. Chinga BJP dol NPP dolni kamko raken jegala. Chinga Bernard Marak-na kakketgipa bichalko nanga ine GH-ni BJP janapataha.