EGH-ni nangrimgimin NGO-rang Mukroh-o goa man•ne sianggipa manderangna mombati so•e bi•chaka

Willamnagar, Nov 24, 2022: East Garo Hilla a•jani nangrimgimin NGO-rang jekai GSU, FKJGP, AAYF, FAF, AIGU, WGCSU, Auto-Taxi Association, Sumo Pick-Up Association aro Skul Chatro Chatrirang re•ang November 22 tarik Monggolbar pringo West Jaintia Hills a•jani Mukroh songo dos gri sak 5 manderangko Assam pulisrang goe galahani gimin jegalaniko dake sianggipa nokdangrang baksa kalimpaaniko mesokna mombatirangko so•e bi•chakangaha.
Assam pulisrang Meghalaya aro Assam a•dokni sima ario songdongenggipa manderangko so•ote galaniara ra•chakna man•gijagipa kam ong•a. Ia a•sel ong•aniara skanggipa ong•ja, indiba bang•a changon, Assam pulisrang sima ari jolrango donggipa songrangona napdrae, Meghalaya a•dokni manderangko rim•e, pattokrango chipe, manderangko dokrurue sinjetaniko aro neng•nikanirangko on•enga.
Indake Assam pulisrangni skatang songrango nape sima ari jolni manderangko kal•steke aro neng•nikate roanirangko naljokatna aro tom•tomaniko ra•bana, Meghalaya sorkari aro Assam sorkari baksa chanchirimaniko dake sima arirango chel•chakgipa Meghalaya pulisrangko donna nanga ine East Garo Hills-ni NGO-rang Skotong Miniater Conrad Sangma-ko didiataha.
Unbaksana Mukroh-o a•sel ong•ani bidingo ning•tue sandianiko dakenba, duko ga•akenggipa nokdangni manderangna kakket bichalko ra•bana nanga aro dos dakgipa pulisrangko kam ra•gale, niam gita sastiko on•china gitaba NGO-rang dabiangaha.