Resubelpara, January 28, 2023:Meghalaya a•dokko tang•doatna aro dingtanganiko ra•bana TMC dilgiparang ku•mikchetanirangko gipatna aro chu•sokatna rakbee kamrangko ka•enga. Re•anggipa antio TMC dilgipa aro Opposition dolni dilgipa Dr Mukul Sangma ming 10 ku•mikchetanirangko parake on•angaha.
“Chinga Meghalaya TMC gipin dolrangna skang manifesto-ko parakatna man•ne namen katchabea. Chinga sorkari rikgenchimode, manderangna lekka porani, sana-banani, bading chiwalani chol, aro dingtang dingtang kamrangko ka•e on•gen” ine Dr Mukul Sangma aganangaha.
Dr Sangma-ni aganprakaniko knana hajalni hajal manderang North Garo Hills a•jani Chotcholja kal•chakramona re•angtokaha. January jani 18 tariko Mendipathar-o ong•atanggipa tom•anio sak hajar 50-na bate manderang bakko ra•angaha, bang•a manderang Mamata Banerjee-ni aganprakaniko knana aro grongrikna re•batokaha.
Conrad Sangma-ni chalaienggipa MDA sorkariko puppet sorkari ba jawani ge•etako dakgipa sorkari ine Dr Mukul Sangma jinmana aganangengon, “NPP sorkariko Delhi-ni manderangsa chalaienga. Re•baenghipa February 27 tarikonin, chinga nitobegipa Meghalaya a•dokko nangrimatna aro dingtangatna kamko ka•anggen” ine aganangaha.
Unbaksana Resubelpara-o ong•atanggipa tom•anio Dr Mukul Sangma, jinma apsan ku•mong nangrime kamko ka•angna sakantiko mol•molangaha.
“Gital sorkariko rikna miksonganiara re•baengipa chasongni manderangna namako tarie donangna aro altue janggi tanganina ja•ku de•ani ong•a. An•chingni a•dokko dingtangatna gita ku•cholsan nangrime kamko ka•angna gita nanggen. NPP-ni sorkari rikanichi an•ching kosto ong•ana agre mamingkoba man•jaha. Uni gimin an•ching pilakan nokgipani on•gimin taningchi nama aro namgijako chanchie seokna nanga. Ku•cholsan kamko ka•jagenchimode, an•chingni a•dok be•grugen” ineba Dr Sangma agandapangaha.
Una chakgipa manderang ku•cholsan ong•e, “Batanggimin bilsi 5-ni gisepo chinga kosto ong•e, mamingkoba man•jaha. Chingni Atchu Ambini a•arangko Assam a•dokna pakwate on•angaha. Chingni ma•a paa, atchu ambini neng•nike janggi tanganiko aro duk mikchi ong•aniko nike, chinga ka•a be•a” ineba aganangkuaha.
TMC-ni bikotgipa WE Card aro MYE Card-ko bakki Card ine agananina aganchakengon, “Chinga a•dokni me•chikmarangna dakchakaniko on•na ku•mikchetaha. Mitam dolni manderang, chinga banoniko aro maidake tangkarangko on•gen ine sing•anirangko knaha. Na•simang ma•sina sikode, TMC dolo nape kamrangko ka•angbo, unon na•simang banoni tangkarangko man•a ma•sigen” ineba Dr Mukul Sangma aganangaha.