Tura, July 16, 2022: Tura Lower Babupara-o chang 104-gipa Garo Labour Corps Day ba Salko Sonibar pringo gisik ra•enba Tura Lower Babupara-o donggipa Cenotaph ba Mangkrong-o West Garo Hills-ni Deputy Commissioner, Swapnil Tembe, TMB-ni CEO Rikse R.Marak, Official-rang, 2nd MLP Battalion-ni Pulis Officer-rang aro gipin dilgiparang bibalni chokchimrangko ra•ange donenba, mande ra•aniko dakangaha.
A•gilsako dal•begipa dakgrikani ba First World War-o dakgrikna 69-gipa Garo Labour Corps-ko seokangaha aro indake ia dakgrikanio rasong gnangbee adita sak A•chik Matgrikrang Tura-ona re•bapilgiparang aro France a•songo janggi galgiparangko gisik ra•na gita Garo Labour Corps Day-ko batanggimin 1919 bilsionin July jani 16 tariko manirongenga.
Apsandake ia bilsioba Tura Municipal Board (TMB) manidilangaha. Ia manianiona, West Garo Hills a•jani Deputy Commissioner Swapnil Tembe, Suprentindent of Police VS Rathore, Tura Municipal Board-ni Chairman JD Sangma, Municipal Board-ni Chief Executive Officer (CEO) Rikse R Marak, bang•a Department-ni dilgiparang, senior citizenrang aro Municipal Board-ni bang•a ka•rimskarang dongpae bakko ra•angaha.
Indake First World War-o dakgrikna seokako man•gipa Matgrikrangko gisik ra•na aro uamangni janggitangko on•kange dakgrikanina mande ra•ani chinko mesokna bilsianti July 16 tariko uamangni bimingrangko see donenggipa Mangkrong-o pul bibalrangko donne bi•chakangtokaha.
Iako gisik ra•engon, Goeragre-ni 2nd MLP Battalion, Salamiko dake mande ra•aniko dakangaha. Ua dal•begipa dakgrikanio France a•songni Rajako dakchakna seokako man•ne re•anggipa A•chik Matgrikrangna minit 2 jrim donge bi•chakangtokaha.
Indake Tura Municipal Board-ni Assistant Engineer Cheyzeil A•gitok Sangma “Garo Labour Corps Day” ni gimin jinmana agantalatangaha aro unbaksana Chairman JD Sangma bi•chakaniko dakangskaaha.
Uandake Bestone D Sangma-ni dingtangmancha, First World War-o dakgrikna re•anggipa Matgrikrangna tarigipa git “Aiao gisik ra•beani” ingipa gitko ring•e mesokangaha.