Tura, October 11, 2022: A•sok sorkari ASHA Payment App-ko a•bachengata. Somoi gita tangka-paisa on•anina dakchakgipa ASHA Payment App-ko a•bachengataha.
Ia digital-ko a•bachengatanichi sak 7000-na baten a•dokni ASHA worker-rang namgnirangko man•aha.
A•dokni Accredited Social Health Activitists (ASHA) worker-rang an•seng-baljokanina kam ka•anio mongsonggipa ong•e kamrangko ka•enba jillarango aro songrango donggipa ma•giparangni aro bi•sarangni an•seng-baljokanina raken kamrangko ka•enga. Uamangni man•na nanggniko kamni kri hajirako on•enga ineba u•iataha.
Indake kamrangko ka•anina dingtang dingtang hukumrangko ra•na nangani gimin somoirangko ru•ute nanga. Ia neng•nikaniko bon•atna, Meghalaya A•dok sorkari ASHA Payment Application-ko a•bachengatanichi ASHA worker-rangni man•gnirangko uamangona sokatna gita dingtangmancha tarigimin tangka gamani chol ong•a. Kror 80 mangni gita gamna nanggipa tangkarangko joma ka•atani ja•mano, a•dokni skotong minister Pa Conrad K Sangma aro Health Department-ni pilak ASHA worker-rangna uamangni man•gni tangkarangko somoi gita sokatna hukumko on•aha.
Jedakode an•tangni phone-ko sambao donne, Mawroh PHC-ni ning•o kam ka•gipa ASHA worker Ma Happy Mawkdoh-ni aganani gitade, “Anga ia jao an•tangni man•gniko angni phone-o kangataha”. Ua app-ni gita, “an•tangni man•gnirangko kangatani sal 5-ni gisepon tangkarang sokbaa” ine aganaha. Ia cholko a•bachengatna skang, ASHA worker-rang adita jarangni ja•mansa tangkarangko man•achim. Indake “Tangka on•na ru•utanichi chingni gisepo bang•a so•sojengjeng ong•atanirang sokbaa”, ine ua aganaha.
ASHA Payment App-ko a•doko ia bilsini March jao a•bachengataha aro da•alona kingking, sak hajalsni sotdoksni (7067) ASHA worker-rangko ASHA Payment App-o biming segataha aro uarangoni sak hajaldok ritchasku chi•bonga (6915) bimingrangko ra•chakaha.Gimik-gimang tangka gong Kror 9.13 tangkarangko joma ka•aha ineba parakataha.
National Health Mission-ni Mission Director Pa Ramkumar S-ni aganani gitade, “Gitcham bewalo kam ka•aniara bakroa, somoi cha•a aro uko dakani bang•a gadangrang donga aro tangka gamaniko ja•manchakata. Batanggimin salrango, ASHA-rangna tangka gamani kamrangko ka•na sal 120-150-rang nangachim, indiba, da•o App-ko jakkalani ja•mano sal 5-oni sal 7-ona komiatna man•aha. ASHA worker-rangna tangkarangko somoi gita sualatna, ia application manderangna ka•dongataniko on•a, maina ia tangka gamanirangko man•soenggipa manderangna sakprakni bank account-ona watata. A•jani aro a•dokni ning•o kam ka•enggiparangna ASHA-rangni kam ka•anirangko nirokna gita chol on•na aro tangka gamani report-rangko apsan somoion bikotna chol on•a. Ia pilak talatanirangko saoba nikna sikgenchimode, wwww.meghahealth.in o gatatgiminko nina gita man•gen ineba u•iataha.
West Jaintia Hills a•jani ning•o donggipa Mowtyrshiah songni bilsi sotbri-sni ong•gipa ASHA worker Ma Judis Shadap, songtangni ba (Local) ASHA facilitator-rangni man•gnirangko kangatna lekkarangko gapate on•anio badita ru•ute nangachim, uko gisik ra•atpile aganaha. Indiba da•ode ua demechikko uni palo ASHA Payment App-o uni man•gnirangko kangatchina on•aha. “Anga da•o dipetde angni man•gnirangko phone gita kangatna altue man•kujaenga, anga angni pilak kamrangko registero see rakkia aro angni demechik app-o angni man•gnirangko kangatna gita dakchaka, ” ine ua aganaha.
Internet bilakgijanirangko chagronggenchimoba, ASHA-rang App-ko jakkale an•tangtangni man•gnirangko kangatenga, maina uamang ASHA Payment App-ko jakkalanichi dingtang dingtang namgnirangko man•a aro altuae aro ta•rakbate kamrangko ka•na man•a ine National Health Mission (NHM), Tura-ni ning•o donggipa District Community Process Coordinator, Piulish R Marak parakataha.
Iana agreba app-ko jakalanichi uamang an•tangni tangka man•gnirangko nina gita man•a aro nina man•jagenchimode, uni a•selkoba nina gita man•a. Da•o dipet, ASHA worker-rangna gamanirangko National Health Mission-ni ning•o dingtang dingtang health program-rangni gita man•na nanggnirangko dondime, badiaba PHC-ni pilak ASHA-rangna, PHC level-oni gita dakchakenga. Chu•gimik gamna nanganirangko japrakon chongmotan jani 30 tariko gamenga. Uni gimin ia app-ko jakkalanichi nama bewalo kam ka•ani aro ka•dongna man•ani ASHA-rangni kam ka•anirangko nambate nirokna man•aniko ra•baha.