Amit Shah-ni agangipa kattana Dr Mukul suk ong•gijaniko parakata
Tura, February 19, 2023: Meghalaya Trinamool Congress (TMC)-ni dilgipa Dr Mukul Sangma, Sonibar salo dam gittam biaprango joljol toma•aniko ong•atangaha. Dr Sangma Gambegre, Rongara aro Raksamgre elakkarango tom•e chanchirimenba a•songni Home Minister Amit Shah-ni Meghalaya a•dokko, “Corruption ong•batsranggipa a•dok” ine aganani gimin suk ong•gijaniko parakataha.
Ia tom•anirango Dr Mukul Sangma baksa Gambegre-ni TMC candidate Ma Sadhiarani Sangma, Rongara-Siju-ni TMC candidate Dr Rajesh Marak aro Raksamgre-ni TMC candidate Dr Prabir D Sangma dongpae bakko ra•angaha.
Dr Mukul Sangma Gambegre elakkao tom•aniko ong•ate jinmana aganprakengon, “MDA sorkari an•chingko indakpile cha•bokaha. MDA sorkari mirong scam, smart meter scam baksa gari scam aro bang•a scam-rangko a•doko ka•aha. Indake a•songni Home Minister Amit Shah Meghalaya a•dokko “a•song gimiko corruption ong•batsranggipa a•dok” ine biming donaha. MDA sorkarini a•sel an•ching a•dok gimik namgija bimingko man•aha” ine Dr Mukul Sangma aganaha.
Indake Rongara-o ong•atanggipa tom•anio Dr Mukul Sangma, “Batanggimin salo A•songni Home Minister Amit Shah an•chingni nitobegipa a•dokko, a•song gimikko corruption ong•batsranggipa a•dok ine agananiko a•songni pilak manderangan BBC news channel aro social media-o niksoenggen ine anga bebe ra•a. MDA sorkarini manderangko cha•boke, kamrangko ka•jani a•sel a•dokni manderang namgijagipa bimingko man•aha. Uni gimin Amit Shah-ni Meghalaya a•dokna on•gipa bimingko gimaatna an•ching gital sorkariko rikna nangenga aro gital dilgiparangko seokna nangenga. NPP dolni sorkari rike a•dokko cha•bokani bidingo ma•mong sorkarini BJP namen ma•sia. Indide ua somoio uamang maina ja•ku de•ja? Maina jrip nie dongaha? re•anggipa 2018 bilsio BJP-an sorkari rikna dakchakaha aro a•dokni pilak scam-rangoba bak dongpaa ” ine Dr Mukul Sangma aganaha.
Bon•kame Raksamgre-o jinmana aganprakengon, Dr Mukul Sangma, “Chinga TMC-ni dilgiparang, Meghalaya a•dokna mairongpile ka•saa. Ia a•dokko silroro namroroatna an•chingni jakon ong•a. An•chingni nitobegipa a•dokko a•palni mande re•bae corruption ong•batsranggipa a•dok ine agangenchimode, uan ra•chakna man•gijagipa ong•a. Uni gimin an•ching ku•cholsan kamko ka•e gital a•dokko riktaina aro corruption-ko bon•atna. Chinga batanggimin bilsi 4 ba bilsi 3-ni gisepo ong•enggipa corruption-ni bidingo sing•sandianiko dakchina gita PMO-na bang•a lekkarangko sedoataha. Indiba MDA sorkari baksa meligrikani a•sel maming ja•kukoba de•jaha” ine Dr Mukul Sangma aganaha.