Williamnagar, March 16, 2022: East Garo Hills a•jaoniko niam gri bol cha•ue salangenggipa bolero pick-up ML-08C-4876 gariko AHAM Rongsak Regional Unit, Budbar pringwalo rim•aha ine kobor man•aha.
Indake niam gri GHADC aro State Forest department-ni maming lekkarang donggija, Garo Hills-o donggipa buringni bolrangko cha•ue pale cha•ani a•sel, changsao Garo Hills Damgipin A•gisi ong•gnok, Garo Hills-o nitoriri aro tangsekgilgil a•brirang aro buringrang gimikchin po•rongrong ong•engaha ineba AHAM parakataha.
“Chinga indake niam gri bolrangko cha•ue salanirangko chel•chakna aro an•chingni a•jao ong•telaigipa buring bolgrimrangko mikkangchi name ripingangan baksa, Garo Hills-ko tangsimbitbit rongtale rakkiangna jotton ka•enga” ine AHAM Rongsak Unit u•iataha.